Albi : Conferéncia de Josiane Bru suls contes d'Aubrac

Lo dissabte 1^èr de febrièr a 17h oras al Centre Occitan Ròcaguda d'Albi (COR) Josiane Bru presentarà lo libre Contes d'Aubrac.

Paregut en 2019 a las edicions Letras d'Òc lo libre Contes d'Aubrac recampa los contes reculits per Marie-Louise Tenèze de 1964 a 1966.

Mas al delà dels contes o de las legendas, reculhiguèt d'anecdòtas o de sovenirs de la vida dels abitants. Sos interlocutors evòcan la duretat de l’ivèrn, la pauretat dels obrièrs agricòlas e dels pichons païsans obligats de partir, qualques còps per de meses, trabalhar dins Lengadòc Bas, en Espanha coma resseguièrs o a París coma portaires d’aiga o limonadièrs.

Trabalhant a la seguida de Marie-Louise Tenèze al catalòg del Conte populaire français mas tanben a l’edicion de collèctas occitanas ineditas (Boisgontier, Lagarde, Perbosc), Josiana Bru retraçarà çò que l’enquèsta revelèt de l’art del conte de transmission orala e farà escotar lors voses.

Presentarà tanben los tres filmes realizats al prèp d’una contaira excepcionala que, en mai dels contes, fisèt a l’etnològa los ressòrts del plaser de transmetre.