La convencion quadre signada en 2017 entre l’Ofici Public de la Lenga Occitana (OPLO) e lo Ministèri de l’Educacion nacionala a per tòca d’espandir e d'estructurar l’ensenhament de l’occitan de la mairala al licèu.

Per aquò far se pausa la question de la didactica pròpria a l’ensenhament bilingüe francés/occitan. L’OPLO per respondre al besonh que se pausa imaginèt lo Grop recerca-accion de didactica bilingüa francés-occitan suls ensenhaments fondamentals a l’escòla primària (GRAF).

L'idèa de l'Ofici es de sosténer las equipas en carga de l'ensenhament e de la formacion en lenga occitana dins lor reflexion e lor practica de l’ensenhament bilingüe. La constitucion del GRAF vòl crear un dialòg entre los diferents actors del mond educatiu, que sián cercaires, formators de terrenh, especialistas de la question o quadres de l’Educacion nacionala. L’objectiu es d’adaptar a tèrme los biaisses de trabalhar dels professionals en classa.

Una 1èra session de trabalh del Grop de recèrca-accion sus la didactica bilingüa a l'escòla primària se debanèt los 22 e 23 novembre de 2021. Los membres del GRAF, se retrobèron a Montalban per una session de trabalh sus la didactica de las matematicas en occitan.

Doas conferéncias èran organizadas. La primièra portava sus las experiéncias de recèrcas collaborativas en didactica de las matematicas : bi-plurilingüisme, ressorsas per la classa e geometria a l’escòla. Èra animada per Caroline Poissard, mèstra de conferéncias en didactica de las matematicas a l'universitat de Brèst.

La segonda s'interessèt als empaches didactics que se pòdon encontrar en matematicas : conceptualizacions e ressorsas contextualizadas, o cossí lengas e culturas pòdon influïr suls aprendissatges escolars e constituïr de ressorsas pedagogicas. Es Jean-Jacques Salone, mèstre de conferéncias en matematicas aplicadas e sciéncias de l’educacion e director de l’Institut de Recèrca sus l’Ensenhament de las Matematicas, de l’Informatica e de las Sciéncias del Centre Universitari de Formacion e de Recèrca de Maiòta qu'animava aquesta conferéncia.

Segon los organizators, quinze personas èran presentas, per escotar aquelas conferéncias e al delà, analisar e montar de sequéncias d’ensenhament de la geometria en occitan. La frucha d'aqueles trabalhs serà mesa a la disposicion dels professors de las escòlas en classa bilingüa


Patrici Pojada sus l'aranés e l'occitan general

L'aranés e l'occitan general

En 2010 la generalitat de Catalonha publicava quatre estudis sus l'aranés e l'occitan general.

Vidèo : entrevista de Maria-Joana Verny

M.-J. Verny

L'entrevista de Maria-Joana Verny (FELCO) per Marius Blenet (França 3). Genièr de 2017.

Tolosa : centre d'excelléncia de l'OTAN dedicat a l'espaci

Espaci

Al mes de julhet de 2023 se dubriguèt a Tolosa un centre d'excelléncia de l'OTAN dedicat a l'espaci.

Séverine Bonnin, cantaira

Séverine Bonnin, cantaira, Fuòc en Gàbia

Dins son edicion del mes de novembre de 2024, lo jornal de la comuna de Tolosa, À Toulouse presentava la cantaira Séverine Bonnin.

Las lengas de l'Union Europèa

En 2013 sortissiá lo libre de Jaume Corbera Pou, La Unió Europea, un mosaic lingüístic. Dins lo jornal La Setmana numèro 1001 Joan-Claudi Forêt ne fasiá la critica.