Dins la revista Occitan ! numèro 142 en 2013, Jacma Taupiac tornava sus l'emplec de l'imperatiu negatiu en occitan. Son utilizacion pòt pausar problèma a los qu'aprenon la lenga. Ramon Chabbert, ja dins las annadas setanta, expicava cossí l'emplegar.

L’escotes pas !

Loís Alibèrt explica clarament que per exprimir una interdiccion (en lengatge gramatical se parla de l'imperatiu negatiu) se ditz : Vengas pas ; Cantes pas ; Tornes pas ; Anes pas enlòc ; Non volgatz o creire (Gramatica occitana, 1935).

La segonda edicion d'aquel libre fondamental (1976) pòrta los meteisses exemples.

Dins la siá Grammaire du provençal modèrne, Louis Bayle pòrta en grafia mistralenca : Legissen, Regardas bèn, mas Toques rèn, Touqués rèn. Es doncas exactament la meteissa nòrma que la d'Alibèrt : l'imperatiu negatiu se fòrma amb lo present del subjontiu.

Josèp Salvat, dins sa celèbra Gramatica occitana plan coneguda (a agut cinc reedicions) pòrta aqueles exemples : Cantes pas ; Cantetz pas. (Cinquena edicion revista per Ernèst Negre, en 1998, pagina 130).

Florian Vernet ditz la meteissa causa. A l'imperatiu positiu Balha-lo-me e Prenètz-las correspond l'imperatiu negatiu Lo me balhes pas e Las prengatz pas (Dictionnaire grammatical de l'occitan moderne, 2000).

Gustave Thérond, nascut en 1866 e mòrt a Seta en 1941, pòrta aquela frasa dins sos Eléments de grammaire languedocienne (2002) : Me parles pas.

Alan Boràs (Alain Bouras), dins sa Petite grammaire de l'occitan dauphinois (IEO de la Droma, 2002) pòrta : Minja-lo ; Lo minjes pas (sic; per minges).

Maurici Romieu e Andrieu Bianchi pòrtan dins lor Gramatica de l'occitan gascon contemporanèu (2005) : « L'imperatiu s'emplega tà marcar un ordi positiu ; si l'ordi es negatiu, es lo subjontiu que s'emplega a totas las personas. Exemples d'imperatiu positiu  : Escota !, Escotatz ! Exemples d'imperatiu negatiu : Ne parles pas ! Ne demorem pas ací ! »

Bernard Moulin, dins sa Grammaire occitane – Le parler basvivarois de la région d'Aubenas (2006) explica el tanben que las fòrmas de l'imperatiu negatiu son manlevadas al subjontiu present : Los escotes pas.

Aitor Carrera, dins la siá gramatica de l'occitan de la Val d'Aran, intitulada Gramatica aranesa (2007) pòrta : Parlatz ! Non parletz !

Lo fach que l'imperatiu negatiu se fòrma amb lo subjonctiu dins totes los parlars occitans fa qu'es, tot naturalament, la nòrma de l'occitan estandard. Cal dire : Canta ! Cantes pas ! ; Escota-lo ! L'escotes pas !; Parla ! Parles pas ! Esitetz pas a me telefonar !

Jacme Taupiac


Extrach del libre de Josèp Maffre 'Lo conse malgrat el'

Cencha de conse

Un tèxt publicat dins la revista Lo Gai Saber en 1939.

Sèrgi Gairal sus Cantalausa

Cantalausa

Après la mòrt de Cantalausa en 2006 Sèrgi Gairal que lo coneissiá plan publicava dins lo jornal La Setmana un omenatge.

Lo collectiu 'Per que viscan las nòstras lengas' escriu al Primièr Ministre

Pour que vivent nos langues

Lo collectiu Per que viscan las nòstras lengas mandèt al Primièr Ministre francés lo 2 de mai de 2025 una letra per lo questionar sus la plaça de las lengas minorizadas dins la reforma de la formacion iniciala e del recrutament dels ensenhaires.

Qualques reflexions de Florian Vernet sus la lenga occitana

Occitan estandard - Vernet

Dins lo present article, paregut en 2016, Florian Vernet presentava sas reflexions sus la situacion de la lenga occitana.

Robèrt Lafont : a prepaus de la mòrt del general de Gaulle

Glèisa Nòstra Dòna de París lo 12 de novembre de 1970

En 1970 morissiá lo general de Gaulle. Dins lo numèro 22 de la revista Viure, Robèrt Lafont tornava sus l'eveniment.