Dins son edicion del mes de setembre de 2025 lo magazine Montpellier Métropole en commun presentava lo fotograf Georges Souche.
Creators d’imatges
Lo sieu sòmi bèl seriá estat d’èstre musician. Puèi venguèt lo temps de la realitat. De trabalhs aicí e alai emai liuraire fornièr per Cevenas. D’oradas a caminar per las rotas al volant de sa camioneta. En contacte dirècte amb la natura. E la revelacion dels païsatges polits. Per Jòrdi Souche, es aquí que tot s’es aviat. « Amb aquela enveja e aquel besonh de mostrar aquela experiéncia que se viviái en solitàri. L’idèa de la fòto es venguda naturalament... »
La revelacion dels païsatges
« La diferéncia amb la musica, es que la fòto es tecnicament pro simpla e s’apren aisidament ». Emai, un còp tornat dins sa region d’origina, prèp de Clarmont d’Erau, se met a fotografiar los luòcs de son enfança, a l’entorn del lac de Salagou. Un encontre fortuit amb un editor, mentre qu’es vengut far enquadrar un de sos clichats, precipita sa trajectòria. E d’unes corses de gestion mai tard, lo vaquí installat coma artisan que farà una seria de cartas postalas en triptics que li asseguraràn una polida reputacion.
Fonda en 1998 la societat d’edicion Cardabelles e dobrís plan Santa-Anna, al Clapàs, una galariá pichona que mantendrà ribon-ribaina dètz annadas.
Un dialòg ininterromput
Mentretant, fa la coneissença de l’escrivan e poèta Max Roqueta que li dobrís a de bon las pòrtas de la lenga e de la cultura occitanas. Amassa, van realizar mantun libre. Max Roqueta fornís los tèxtes, Jòrdi Souche, los met en resson amb sos imatges. « Del meteis biais que me servissi de la fòto per comunicar, se servissiá de l’occitan, per tot exprimir, sa relacion als elements, a la natura... A son biais, èra tanben un creator d’imatges ».
Un dialòg que la quita mòrt de l’escrivan — en 2005 — arriba pas a interrompre. Per pròva, la parucion venenta d’un obratge novèl que mescla tèxtes e imatges : La comba dels sòmis que fa l’objècte d’un apèl participatiu a la plataforma Ulule.
