Davant los fenomèns de regression e lo perilh de mai en mai gròs que menaça la lenga occitana, la Coordinacion Per la lenga occitana ! Anem Òc ! apèla a una granda mobilizacion per l’occitan lo dissabte 24 d’octobre de 2015 a Montpelhièr.
Comunicat de La Coordinacion (Institut d'Estudis Occitans, Calandreta) :
La lenga occitana es marcada per l'Unesco coma una de las lengas en « dangièr seriós d'extincion ».
Fàcia a aqueste perilh de mai en mai gròs, e a las riscas de regression qu'amenaçan nòstra lenga, la Coordinacion per la lenga occitana apèla a una mobilizacion ciutadana per organizar una granda manifestacion sociala e revendicativa en favor de l'occitan, lo dissabte 24 d'octobre de 2015, a 14:00, a Montpelhièr. De fach, dempuèi 2005, la Coordinacion a pas decessat d'alertar los poders publics de l'urgéncia de metre en plaça una politica lingüistica publica coerenta e volontarista per la transmission e lo desvolopament de las lengas regionalas (e donc de l'occitan), de la necessitat d'una lei qu'oficialisca sa reconeissença e li garantisca un estatut juridic legal propici a son espandiment.
Las manifestacions de Carcassona (2005 e 2009), Besièrs (2007), e enfin la darrièra de 2012 qu'acampèt 30 000 personas a Tolosa, an ben mostrat l'existéncia d'una vertadièra demanda sociala per la preséncia de l'occitan dins la vida publica. Emai aquesta seria de manifestacions aja permés qualques avançadas, los progrèsses ne'n demòran pasmens fòrça insufisents.
Se mai d'una collectivitat territoriala prenguèron consciéncia de la necessitat de metre en plaça de mesuras en favor de l'occitan, l'Estat, per quant a el, refusa totjorn d'assumir sas responsabilitats sus aquesta question.
La crisi deu pas servir d'escapatòri per escafar la question de las lengas regionalas del debat public, per anar de reculons e far demenir los mejans meses a disposicion per son desvolopament.
Mas ont son donc passadas totas las bèlas promessas ? Entre autras : la promessa numèro 56 : Je ferai ratifler la Charte européenne des langues régionales ou minoritaires ? Una majoritat de deputats avián votat lo principi de la ratificacion de la Carta europèa, mai dempuèi... pas res !
D'autra part, venèm de subir una reforma territoriala qu'a pas ges tengut compte de la dimension lingüistica de nòstre territòri.
E oblidem pas la tota darrièra que ven de sortir ! Cossí acceptar una reforma dels collègis qu'es quasiment una programacion de la disparicion efectiva de l'ensenhament de las lengas regionalas, tre 2016 ? Per aital la Coordinacion per la lenga occitana, crida un còp de mai a la mobilizacion de totes aqueles que revendican la preservacion e lo desvolopament de la lenga occitana (patrimòni immaterial de l'umanitat) que nòstre territòri a en partatge. Devèm afortir un còp de mai los dreches de nòstra lenga e sa legitimitat !
« Anem Òc ! per la lenga occitana ! » Totes a Montpelhièr lo 24 d'octobre de 2015 !
