Lo 9 de julhet de 2018 se tenguèt a l’Ostal de Region de Clarmont d’Auvèrnhe una amassada per la lenga. Lo Congrés permanent de la lenga occitana que participava a l'eveniment comunicava.
Amassada per la lenga e la cultura occitanas
en Auvèrnhe-Ròse-Alps
Lo 9 de julhet a l’Ostal de Region de Clarmont d’Auvèrnhe se faguèt l’Amassada per la lenga e la cultura occitanas en Auvèrnhe-Ròse-Alps ont s’acampèron mai de 50 personas representantas de las associacions e institucions occitanas e de la region.
La jornada se dubriguèt amb una vidèo d’acuèlh de Laurent Wauquiez, president de la Region, que declarèt qu’Auvèrnhe-Ròse-Alps èra « una granda region d’Occitània » e que la lenga i èra enrasigada en tot estant « extraordinàriament modèrna ». Anoncièt tanben un programa d’accions a venir, amb de convencions, per desvolopar la lenga dins la region.
Seguiguèron las intervencions de François Duval (director de la Cultura de la Region) e de Gilabèrt Mercadièr (president del Congrès).
Se passèt puèi d'extraches de dos filmes per far plan veire l'importància e la valor de la transmission per l'ensenhament bilingüe.
Bernat Giacomo (CFPO Auvèrnhe) presentèt un panorama complet dels actors e de las realizacions mèstras en region, seguit per las intervencions de Desdièr Huguet (ensenhament public), Marie Barret (federacion regionala Calandreta), Thierry Bousseau (agéncia Sirventés), Jean Roux (IEO), Jean-Baptiste Martin (edicions EMCC), Mickaël Neyrolles (IEO Ròse-alps), Jean-Pierre Bonnet (Universitat de Clarmont).
Lo vèspre se trabalhèt en taulas redondas – ensenhament e transmission, accion culturala e creacion artistica, edicion e difusion, socializacion e mèdias. Los raportaires presentèron per cada talhièr de proposicions d’objectius e d’indicators d’evaluacion. Se publicarà aquestas setmanas un document de sintèsi d'aquela amassada.
Enfin Martine Guibert, vicepresidenta de la Region, clavèt la jornada. Los participants e los representants de la Region s’acordèron sus la qualitat dels escambis e prepausèron que l’Amassada siá annadièra. Aquel 9 de julhet, que permetèt als actors de la cultura occitana d'escambiar entre eles e amb la Region, es doncas una data importanta per la cultura e la lenga dins lo Nòrd e l’Èst d’Occitània !
Lo Congrés permanent de la lenga occitana
*
Intervencion vidèo de Laurent Wauquiez abans l'eveniment ont, tot en saludant los convidats, afirma l'identitat, per part, occitana de la region que presida, e sa volontat d'ajudar al desvolopament de la lenga.