Los signataris de la carta lo 26 de genièr de 2017 a Tolosa

Signatura de la convencion quadre per l’ensenhament de l’occitan

Lo 26 de genièr de 2017 es estada signada a Tolosa per la ministra de l’Educacion Nacionala, Najat Vallaud-Belkacem, la convencion quadre per l’ensenhament de l’occitan.

Aquela convencion establida per l'Ofici Public de la Lenga Occitana (OPLO) s'aplicarà a las doas regions membres d'aquel ofici : la region Nòva Aquitània e la region Occitània. S'aplicarà dins cinc acadèmias.

Absentas de las discucions : las regions Provença-Alps-Còsta d'Azur, e Auvèrnha-Ròse-Alps que son pas membre de l'OPLO. Lo tèxt afortís pr'aquò que l'ensenhament de la lenga occitana concernís tanben aquelas regions, e rapèla que la lenga es tanben presenta en Itàlia e en Espanha.

Lo fach d'aver un tèxt signat per la ministra puslèu que pels rectors es vist coma un progrès pels comentators, i veson un engatjament de l'Estat.

Lo tèxt definís los objectius, prevei una convencion amb Canopé per la produccion de material pedagogic, precisa las modalitats d'ensenhament, precisa lo ròtle de l'OPLO rapòrt a las administracions en carga de l'ensenhament de la lenga occitana.

Aquela convencion serà aplicabla fins al 31 decembre de 2022.