Dins sa revista d'octobre e novembre de 2017 la region Occitània comunica en occitan sus los mejans d'aprene la lenga occitana.

Aprene la lenga d'òc

La transmission de l’occitan es l’enjòc de nòstre temps : la lenga es dins una situacion dificila dins un mond ont, cada jorn, la pluralitat lingüistica es mesa a mal. Cal plan realizar que (segon l’UNESCO) una lenga desapareis cada doas setmanas e que, se fasèm pas res, 90 % de las lengas van probablament s’escafar avant la fin del sègle.

Podèm, aquí, en trabalhant a la salvagarda de l’occitan, obrar contra aquel apauriment de la riquesa culturala mondiala.

Es evident que la subrevida de la lenga passarà per l’ensenhament. Aquel periòd d’entrada escolara es l’escasença de tornar sus l’oferta variada per poder apréner lo lengatge de l’amor. Podèm començar « a rebors » amb l’Universitat ont existisson un cursus complèt de licéncia, master, doctorat, una preparacion al Capes d’occitan e despuèi aquest an : una Agregacion en lenga d’òc. Las Universitats de Montpelhièr e de Tolosa propausan aquel ensenhament especialista o opcional, en presencial o a distància.

Es tanben possible de passar un concors especific de professor de las escòlas en occitan. La lenga d’òc es tanben ensenhada al licèu (opcion, LV2, LV3), al collègi (opcion mas tanben ensenhament bilingue public o Calandreta), al primari (en iniciacion o en bilingue public o en Calandreta). Las situacions son plan divèrsas sul territòri regional e lo trabalh es encara enòrme per installar un ensenhament equilibrat e coerent.

Esitètz-pas de demandar un ensenhament en occitan quand es absent de l’establiment, de vos entresenhar alprèp de las associacions coma la FELCO (Federacion dels Ensenhaires de Lenga e de Cultura d’Òc) o Calandreta (las escòlas associativas occitanas).