Dins son magazine de la prima de 2024 la region Occitània tornava sul plan Parlem una cultura viva.

Parlem una cultura viva, primièr bilanç

En decembre de 2022, la Region adoptava son plan Parlem una Cultura Viva. Retorn sus una annada de mobilizacion per tal de promòure e valorizar las lengas e las culturas regionalas d’Occitània.

Lo bilanç d’aquesta primièra annada seguida per Benjamin Assié, conselhièr regional delegat a las politicas lingüisticas occitana e catalana, es positiu amb mantunas accions mai que mai en çò que pertòca l’ensenhament e la formacion coma l’informacion dels jovents sus las oportunitats professionalas e los mestièrs ligats a las lengas e culturas regionalas durant de salons de la formacion o tanben la mesa en plaça d’una rubrica dedicada a l’occitan e al catalan sus l’Ordi donat als joves liceans.

Per aquesta 1èra annada, los espacis publics an vist espelir de novèlas senhaleticas bilingüas. Es lo cas per la gara e l’Ostal de Ma Region de Fijac (46) per exemple, e tanben lo licèu de L’Isla de Baish (32). Un partenariat amb la SNCF a permés tanben de metre en plaça d’anóncias sonòras trilingüas sus cèrtas linhas de trens coma per exemple las linhas de Cerbera (66) → Tolosa e Tolosa → Aush.

Del costat de las rets socialas, 2023 foguèt fruchosa amb la 1èra crida a de projèctes destinats als joves creadors de contenguts en lengas regionalas, la creacion d’una pagina Facebook Parlem una Cutura Viva e la realizacion d’un clip de promocion de l’ensenhament bilingüe precòç.

I a tanben de novetats per la cultura amb l’obertura de la categoria Ò mon País del Prèmi Nougaro a las lengas regionalas e un primièr prèmi agantat per un poèma francés/catalan, o, mai, un còp de man a la difusion d’espectacles en occitan e catalan amb lo lançament d’un catalòg sul site internet de la Région.

De remembrar tanben, l’edicion d’una guida Petit Fûté sul « Patrimòni immaterial en Occitània ».

L’an 2024 serà ric amb l’organizacion del 18 al 23 de març de la 1èra edicion de la Setmana regionala de las lengas occitana e catalana.

Sorsa del tèxte : Le journal de ma région, prima de 2024, pagina 25.