En aquesta debuta d'estiu de 2022 l'executiu de la region Occitània sus son site precisava sas intencions en matèria de politica culturala. Los elegits vòlon al còp estructurar e desvolopar los festivals e los ancorar territorialament. Tornan rapelar que son quasi 150 festivals que son sostenguts per la region per prèp de 4,5 milions d'èuros.
Aqueles festivals tòcan de domènis artistics e culturals variats : dança, musica, teatre, arts graficas... Pòdon animar sus de temps long e donar aital de visibilitat als territòris. Ajudan tanben la creacion occitana.
Carole Delga, presidenta de la Region, precisa : « Occitània es fièra de se poder presentar coma la region als 1001 festivals ! Desplegats tot l'an sus l'ensems del territòri, explorant totes los domènis de le la creacion artistica, testimonian de l'espectaclosa vitalitat culturala de nòstra region e atiran un public sovent mai jove e mai diversificat que los equipaments culturals classics. Los festivals contribuïsson tanben al raionament del territòri al delà de las frontièras regionalas e afichan de retombadas economicas e toristicas consequentas. »
