Gara de Perpinhan

Gara de Perpinhan

Dins son edicion d'octobre de 2021 lo magazine de la Region Occitània informava sos lectors sus la preséncia a venir de la lenga occitana e de la lenga catalana dins qualques garas SNCF.

L’occitan e lo catalan dintran en gara

Èra una volontat plan afirmada de la Region durant la signatura de la convencion amb la SNCF pel periòde 2018-2025 que met negre sus blanc las exigéncias e espèras de la Region en matèria de servici public ferroviari de transpòrt de viatjaires : desvolopar la senhaletica bilingüa sonòra e visuala dins los trens e las garas de la region Occitània.

Las linhas Tolosa-Aush per l’occitan e Tolosa-Cervera pel catalan son estadas causidas per lançar lo projècte. La linha Tolosa-Aush se situa principalament en zona gascona mas çò que s’ignòra d’unes còp que i a es qu’una part del traçat se situa en zona lengadociana.

E doncas, lo Congrès Permanent de la Lenga Occitana cargat del projècte a la demanda de L’Ofici Public de la Lenga Occitana (OPLO) a prepausat una varietat d’occitan que ten compte de las particularitats de la linha pr’amor que los ciutadans se ne pòscan apropriar la senhaletica.

Emai, Tolosa coma Aush son dotadas d’una senhaletica bilingüa de carrièra e de dintrada d’aglomeracion. En complement, L’Isla de Baish a desplegat una senhaletica bilingüa fòrça completa, en part gràcias al sosten de la Region Occitània qu’a notadament mesa en plaça la senhaletica bilingüa dels licèus de la vila.

La votz de Jùlia Taurinyà, jornalista de França 3 País Catalan

La version catalana de la Linha Tolosa-Cervera es estada produsida per l’Ofici Public de la Lenga Catalana. Presidit per Carole Delga, l’OPLC recampa l’Estat, la Region Occitània/Pirenèus-Mediterranèa, lo Departament dels Pirenèus Orientals, la Vila de Perpinhan, lo sindicat intercomunal Sioccat e l’Universitat de Perpinhan e assòcia un Conselh scientific e un Collègi associatiu de vint-e-cinc associacions.

Pels enregistraments sonòrs de la linha Tolosa-Cervera, la causida s’es facha sus Júlia Taurinyà, jornalista catalanofòna de França 3 País Catalan, estant qu’a una votz e un frasat que permet de metre en relèu tota la riquesa de la prononciacion del catalan de Catalonha Nòrd.

Enfin, la senhaletica materiala, ja desvolopada sus una part del territòri coneis tanben una novèla fasa de desvolopament. Aital, los panèls de la gara de Perpinhan foguèron remplaçats que tenián una error ortografica, e la gara de L’Isla de Baish serà rapidament dotada d’una senhaletica bilingüa francés/occitan integrala.

Jornal de la Region Occitània, numèro 21, octobre de 2021