Après la publicacion per Elon Musk en 2013 d'un document definissent lo concèpte d'iperlop, qualques entrepresas se son creadas per fins de desvolopar las tecnologias necitas.
L'idèa èra de far circular dins de tubes mantenguts a bassa pression de vagons sostenguts per de camps magnetics.
Tres entrepresas màger espeliguèron :
- HyperloopTT o Hyperloop Transportation Technologies (HTT) ;
- TransPod e
- Virgin Hyperloop o Hyperloop One.
Las tecnologias necessàrias per poder concretizar aquel tipe de mejan de transport son de mal mestrejar. En 2024, HyperloopTT e TransPod son encara en activitat e comunican regularament.
Virgin Hyperloop cambièt encara de nom en 2023 per venir H1. Comunica pas pus dempuèi la fin de 2023.
D'autras entitats vegèron lo jorn :
*
HyperloopTT al mes de genièr de 2024 creèt la coentrepresa Hyper Builders amb Webuild e Leonardo. L'objectiu es de desvolopar lo primièr iprerlop operacional a mand de carrejar de merças e de passatgièrs entre Venècia and Padoa en Itàlia. Aquel iperlop aurà per nom Hyper Transfer.
Alara que HyperloopTT es basat als Estats-Units, las societats partenàrias, Webuild e Leonardo, son europèas, basadas en Itàlia.
HyperloopTT emplega la tecnologia depausada Inductrack™ : sistèma de levitacion magnetica passiva. Los asimant, arrengats en un malhum dich de Halbach, posicionats sus un ralh d'alumini generan un camp magnetic quand los vagons se desplaçan.
Transpod de son costat desvolopan los FluxJets. Al mes de julhet de 2022 comunicavan sus l'avançament de lor recèrcas.
Los FluxJets son de veïculs electrics entre avion e tren. Lo FluxJet se mòu guidat per de ralhs. Sa velocitat pòt montar fins a 1 000 Km/h. Contrariament a la tecnologia d'HyperloopTT los vagons de Transpod levitaran pas, seràn puslèu coma d'avions pichons preses entre quatres ralhs metalics lo tot ensarrat dins un tube.
Un primièr projècte de construccion es estat desvelat per Transpod, prevei de religar las vilas de Calgary e d'Edmonton al Canadà.
Los engenhaires de Zeleros desvolopan eles una tecnica de levitacion magnetica activa associada a una propulsion aerodinamica electrica a elice. La velocitat de lors capsulas seriá de 1 000 Km/h. Trabalhan sus una version cargo e passatgièrs. La societat Zeleros es basada en Espanha.
Nevomo ben qu'inclús frequentament dins lo microcòsme entreprenarial dels iperlops desvolopa puslèu un nòu mejan de propulcion electrica pels trens que podriá a la perfin èsser inclús dins de tubes per n'augmentar la velocitat. Se consacran unicament al transport de merças. Son basats en Polonha.
En 2023 Hardt Hyperloop bastissiá d'infrastructuras de tèst per iperlop a Groningue, als Païses Basses. Preveson de realizar los primièr ensages en 2024.
Swisspod Technologies bastiguèt a Lausana en Soïssa un tube d'ensag de pichòta dimencion en anèl. En 2023 efectuavan lor primièr tèsts amb una maqueta.
La maqueta del vagon de Swisspod prèsta a èsser testada © Swisspod, 2023
Al mes d'Octobre de 2023 es estada creada a Brussèla la primièra organizacion remosant los industrials actius dins lo domèni dels iperlops : Hyperloop Association.
Los membres fondators son : H1, Hardt Hyperloop, HyperloopTT, Nevomo, Swisspod Technologies, TransPod e Zeleros.
