La Calandreta d’Agde en partenariat amb lo CIRDÒC e Lectura & Òc organiza lo 4 de mai de 2018 la 3ena Passejada Literària : granda fèsta a l’entorn del libre joinesa en occitan.

Lo Prèmi Literari Calandreta serà remés en foncion de la votacion dels joves lectors, mai de 1 000, qu'auràn a votar per l’obratge qu’aiman lo mai entre una seleccion d’òbras en occitan.

Al programa de la jornada :

Tre lo matin : encontre amb los autors, escambis a l’entorn del plaser de legir.

Dins la tantossada :

A 13h30 : remèsa del Prèmi Literari Calandreta a la Pineda, darrièr lo Musèu de l’Efèb.

A 14h30 serà presentada al Palais des Congrès la pèça de teatre : Pèire Petit de la companhiá la Rampe-TIO.

Una creacion d’après las òbras Petit Pierre, pèça de Suzanne Lebeau, e Le Manège de Petit Pierre de Michel Piquemal.

Presentacion : « Aquí avèm un poèma long que s’escota, un monològ contat a doas voses ont se mesclan l’istòria granda e l’istòria pichona : Pierre Avezard, dich « Pèire Petit » fàcia al mond que s’embala : las guèrras, las crisis, la modernitat...

« Sord-mut e bòrni de naissença, Pierre Avezard exerça d’activitats de vaquièr e de boscassièr dins de bòrias dins lo Loiret. Tre 1947 (a 28 ans), comença a la Coinche, la bòria ont s’installa definitivament, la construccion de son òbra mai coneguda, un manètge, dich « le manège de Petit Pierre ».

« Es sa vida que los dos comedians (Gilles Buonomo e Ives Durand) contan sus scèna : la d’un enfant puèi d’un òme « diferent ».

« Dison sa vida coma un conte simplòt e doncas, de còps, crudèl. »

agde