Dins lo sieu magazine d'informacion del mes de mai de 2018 à Toulouse la ciutat mondina comunicava sus las activitats culturala ligadas a la lenga occitana. L'article :

Qué de nòu jol palmièr ?!

La manifestacion del Convent dels Jacobins serà tota dedicada a l'òc. Lo simbòl d'una annada ont la cultura occitana es a l'onor.

2018 es una annada particulara a Tolosa : de junh a decembre la vila anóncia « un temps fòrt » per la cultura occitana. « Profitam de la commemoracion dels 800 ans de la liberacion de la vila pendent la Crosada contra los Albigeses, per multiplicar los eveniments e las accions », expliquèt en gènier Joan-Miquel Latas, primièr adjunt de la Comuna, notadament en carga de l'occitan. Dins los meses qu'arriban lo programa serà bèl e diversificat, es a dire pas unicament centrat sus la cultura. D'accions socialas, educativas, de conferéncias son tanben organizadas.

E per dubrir aquel temps fòrt, lo Convent dels Jacobins convida lo public del 8 al 10 de junh per tres jorns e doas nuèits d'animacions e « una granda fèsta ». La 4èna edicion de la manifestacion « Quoi de neuf sous le palmier ? », faita per valorizar aquel tresaur del patrimòni de la ciutat mondina s'organiza ongan dins lo cadre del dispositiu regional per la cultura occitana Total Festum.

Lo Director artistic de l'eveniment explica que volguèt metre la votz e la paraula al centre de totas las activitats, en ligam amb l'istòria dels luòcs, fondat per l'òrdre presicaire dels Dominicans. Son previstes de concerts de grops vocals, mas tanben de talhièrs d'escritura, de cant, d'animacions pels enfants... « La programacion es familiala e dubèrta als afogats de la cultura occitana coma als autres, que venon primièr per veire lo bastiment, assegura Clamenç Baudry. Volèm sustot implicar lo mond : cadun poirà escriure de messatges que seràn dits per un cridaire, e los que vòlon auràn la possiblitat de prene la paraula per dire çò qu'an escrit o sentit pendent lor passatge. » Un talhièr permetrà de fargar d'aucèls siulaires en argela, un autre de masquetas.

Enfin lo dimenge, tot lo mond es convidat a un repais partejat que permetrà, lo temps de manjar, d'escambiar amb los artistes, de cantar emai de profitar d'una sièsta poetica e musicala.