L'estiu nos convida a balar amb sos festenals, concèrts e autras manifestacions festivas.
Lo magazine de la region Occitània de julhet de 2018 torna sus la tradicion occitana del balèti e suls eveniments prevists.
Lo balèti : convivéncia e cultura occitana
La musica populara es sovent estada ligada – e l’es encara – a la dança ! Deu èstre capable de far sautar e balar los pichòts, los ancians, los joves e los mai grands, de totas classas socialas e totas originas. Es lo sens primièr del balèti ! Lo « balèti » es, etimologicament, lo « bal » o, d’un biais modèrne, lo « dancehall » per tornar prener un terme Jamaïcan... D’alhors los Massilia Sound System (grop de reggae marselhés d’expression occitana) se son pas enganats en propausant de « ragga-balètis » e en renovelant l’esperit del genre, entre Jamaïca e Occitània.
Dempuèi lo regrelh de la musica dicha « tradicionala » dins las annadas setanta, las musicas per dançar quitèron los musèus de la folclorizacion per tornar suls emponts e far susar los amators ! Los festenals e grands balètis enfuocats recampan ara de milierats d’afogats del « balèti » qu’encadenan quasi esportivament las danças suls ritmes descabestrats. I a los musicians de balèti classic que respièchan los còdis del genre e puèi d’autras formacions que cèrcan de far evoluïr la musica (amb, per exemple, l’emplec d’intruments modèrnes e electronics). De tot biais la tradicion es totjorn estada en movement e quita pas de bolegar, es son esséncia : èstre a l’escota del mond e de las influéncias de son sègle.
Cal plan realizar que los instruments diches « tradicionals » son estats de grandas noveltats en son temps e que foguèron menats, sovent, per d’estrangièrs.
Dins la Region Occitània / Pirenèus-Mediterranèa nombroses son los rendèz-vos de notar. Lo periòde de la granda fèsta regionala de Total Festum, segur, es un moment clau ont los balètis fan flòri.
L’Universitat occitana d’estiu de Nimes, per exemple, serà l’escasença d’un balèti amb Castanha e Vinovèl lo 9 de julhet, lo collectiu Le Bal du mois capita el d’organizar un balèti per mes en Losèra, l’Estivada de Rodés serà tanben (del 19 al 21 de julhet) un moment important (e dins totes los estiles, balèti folk o balèti rock-raggamufin...), enfin, notatz-lo en avança : las famosas Trad’hivernales de Somièiras (generalament en genièr) que demòran un moment fòrt, un ponch d’ancoratge dins l’annada per totes los dançaires.
Citarem pas totes los eveniments aquí tant las iniciativas son nombrosas. Lo balèti es abans tota causa un moment de rescontres e d’escambi, popular, dobèrt e intergeneracional, es la fòrça universala de la musica per dançar qu’empòrta los còrses e los esperits. Alara, dintratz dins la ronda !
