Visual del festenal L'Occitan fa punk de 2022
Dins son edicion de novembre de 2022, lo jornal de la comuna de Tolosa, À Toulouse presentava lo festenal L'Occitan fa punk amb un entrevista de Léo Devillers que n'èra l'iniciator.
La cultura occitana es ja creolizada
– Sètz pas brica eissut del mitan occitanista, cossí avètz agut l'idèa d'aquel festenal ?
Soi arribat a Tolosa fa dos ans e çò que primièr me restaquèt a la cultura d'òc es lo mètro e los noms de las carrièras. Après rescontrèri de personalitats de la cultura occitana e m'avisèri qu'aicí es una cultura tras qu'ancorada, territorializada, sustot en comparason amb Bordèu d'ont arribavi. Abans d'èsser programator cultural, faguèri un trabalh de cèrca sus l'etiqueta « musicas del mond », qu'es un etiqueta tanben post-coloniala, puèi que son los occidentals que rendon visiblas o non aquelas musicas. E aviái l'idèa de mostrar que l'occitan tanben pòt èsser dins las musicas dichas del mond : coma conta una istòria, una cultura, una lenga, es tant « exotisant ». Es pas la pena d'anar luènh.
– Lo festenal durèt doas setmanas : voliatz mostrar la creacion en òc d'un biais larg ?
La programacion s'es facha en charrant amb de mond coma Rafeu Sichel Bazin qu'ensenha a l'universitat, Pascal Caumont del conservatòri o lo cantaire Dje Balèti que me faguèron de proposicions. Al final, i aguèt de musica, de conferéncias, de balètis, de projeccions, de teatre, de circ e de dansa. Descobriguèri que la cultura occitana es fòrça rica e fòrça creolizada ja, doberta sul mond. En mesclant los folclòrs se podriá dire que se bastisson de neo-folclòrs e aquò's infinit.
– Aquela primièra anóncia una seguida ?
Ongan, l'organizator èra lo Centre d'Iniciativa Artistic del Miralh, que se maina de la programacion culturala sul campus. Mas la tòca es de daissar l'afar ara a l'associacion dels estudiants occitans, Òsca. Son ja eles que faguèron la serada Balètis dels tripons. Avèm poscut lor transmetre un pauc la gramatica dels eveniments culturals, per ben organizar. Aquò permetèt ja de balhar de visibilitat a l'ensenhament de l'occitan sul campus. Avèm agut de bèlas manifestacions : un carnaval salvatge amb la Vespa Cogordon, una conferéncia sus la pop-cultura e l'occitan o una carta blanca amb lo realizator Amic Bedel.
Magazine À toulouse 92, novembre de 2022
