L'IEO d'Erau ja plan actiu sus la tela es a tornar pensar sa comunicacion sus internet. Al mes de febrièr de 2021 comunicava.

Crida a illustracions participativas

Amigas, amics, l'IEO 34 es a tornar pensar e fargar un site internet novèl. Aqueste site, lo volontam representatiu de çò que sèm dins Erau, dins tota nòstra diversitat, païsatges e personas, e es aquí qu'avèm una demanda de vos formular.

Per las illustracions dau site, nos fa mestièr de fòtos numericas, de bona resolucion e liuras de dreches, de vòstres endreches, vilatges o vilassas, monuments, garrigas, vinhas, estanh o mar... capitèlas, masets, cabanas o barraquetas. Retraches tanben de femnas e d'òmes d'òc, de la paura vòstra Tanta Nina, de fèstas, d'animacions que portèretz, d'animals totemics, etc...

De causas tan polidas coma nautres ! (segur, per pauc que l'ajam, metrem sus la fòto lo nom de son autor)

E sabèm que n'avètz de plens tiradors numerics, d'aquelas fòtos qu'aimatz plan... Alara, mercés de las partejar, de las far viure, de nos en mandar qualqu'unas...

Lo site novèl va integrar una carta dau departament interactiva qu'i seràn portats dessús cada cercle o associacion. Picaretz sus un drapelon e tombaretz sus una pagina que serà dedicada a la vòstra associacion. Èra ja mai o mens coma aquò sus l'ancian site qu'es pas pus a jorn. I metrem çò qu'aurem coma informacions, las podèm pas inventar.

Per aquò far, mercegi doncas los capolièrs de cada associacion d'emplenar e de mandar lo document estacat 2021, Formulari associacions que las pòsque metre a jorn. E vos demande mila perdons de vos faire pèrdre de vòstre temps preciós mas aquò nos fa mestièr.

Aquí tanben cal de visuals, logo, fòtos, afichas, vidèos per metre en segonda part de pagina.

Mèfi, que se tracha pas de me faire la lista exaustiva dels eveniments que portèretz dempuòi l'an pebre mas de donar una idèa generala de çò que sètz, sus las manifestacions qu'avètz costuma d'organizar, etc...

Los eveniments a venir prendràn puslèu plaça dins la comunicacion setmanièira de l'IEO e sus lo blòg.

E, ... rau !

Sorsa : site de l'IEO d'Erau lo 16 de febrièr de 2021.


 

Totèm : lo camèl de Besièrs

Camèl de Besièrs

En 2017 sortiguèt la revista Los rocaires numèro 2 amb de contes suls animals totemics.

Volocopter tèsta lo sieu veïcul

Volocopter ven de realizar lo 14 de setembre de 2019 un tèst de son veïcul volant.

Critica de Sèrgi Viaule del Libre 'Lo Mandarin'

Lo Mandarin

Al mes d'agost de 2020 sortiguèt en occitan traduch per Joaquim Blasco lo libre de José Maria Eça de Queiroz Lo Mandarin.

Per un modèl mimetic del contacte de lengas - Patrick Sauzet - 1987

Sul perqué de l'abandon de la lenga occitana, al delà del modèl erosiu e del modèl conflictual. Un article de Patrick Sauzet dins la revista Lengas.