Lo Centre Cultural Occitan de Roergue comunica (sorsa Lo Diari numèro 20) :
Una de las librariás « occitanas » la mai completa es la del Centre Cultural Occitan de Roergue. I trobaretz de produches culturals de tota mena en rapòrt amb la lenga occitana, la cultura e l’istòria locala. Uèi [fin de 2014], aquela librariá que, sus son sector d’activitat, es sens dobte la principala de la Region, se vòl encara desvolopar en far l’escomesa d’Internet e del pagament dematerializat.
Lo Centre Cultural Occitan de Roergue (C.C.O.R.) es una associacion, creada en 1979 pel Grelh Roergàs, l’Institut d’Estudis Occitans d’Avairon, la seccion teatrala de la Pastorèla de Rodés e de nombrosas personalitats occitanas. Lo C.C.O.R. sèi a la Mission Departamentala de la Cultura (M.D.C) a l’Institut Occitan d’Avairon (I.O.A), al Grelh Roergàs, al País Rodesenc e a L’Ostal Joan Bodon. Es afiliat e sèi a l’IEO 12.
Participa amb l’ensemble de las associacions occitanas a las diferentas manifestacions de promocion de la lenga e de la cultura occitanas (participacion a las Assisas de la Cultura Occitana per tal de definir un quadre reglamentari pel desvolopament de l’Occitan dins l’ensenhament, los mèdias, la vida publica).
Lo C.C.O.R. compta uèi perseguir e desvolopar sas accions d’animacion a l’entorn de la cultura occitana e capitalizar sul succès incontestat de l’Estivada per far d’Avairon un territòri d’excelléncia per la lenga e la cultura occitanas.
Menat per l’objectiu d’obrar a la promocion, la difusion e a la defensa de la lenga e de la cultura occitanas dins totis los domenis, lo cercle de Rodés decidiguèt d’obrar a la difusion de productes culturals en occitan en installant una librariá al dintre de son local.
Aital dempuèi 1982, installat al centre vila de Rodés, al dintre de l’Ostal del Patrimòni, lo centre cultural occitan vòl facilitar l’accès del public a una gama totjorn mai larga de productes culturals : libres, CD, DVD e autres.
Aquela difusion s’es considerablament desvolopada a flor e a mesura del desvolopament de la librariá botiga e de l’impressionanta preséncia del taulièr del Centre Cultural Occitan de Roergue a de nombroses eveniments del departament e d’endacòm mai. Lo cercle rodesenc anant tanben ponctualament expausar sos produches culturals a París. Aquela omnipreséncia pòrta sas fruchas e las vendas que se trapan ja dins un volum fòrt interessant contunha de créisser (+ 20 % en 5 ans).
Uèi, lo CCOR decidiguèt de passar un autre nivèl per son activitat de difusion de produches culturals en passant a la venda en linha. A l’imatge de çò que se passa per una granda part de nòstra economia, e encara mai en matèria de difusion de productes culturals, lo passatge a internet e amb pagament en linha representa un fòrt enjòc. Mercé al pagament en linha lo C.C.O.R. compta desvolopar largament sas comandas (ja mai d’un centenat de comandas per an via son site classic).
D’efièch, encara uèi, nombre de vilas o de departaments mancan d’una vertadièra ofèrta en matèria de produches culturals occitans. En creant aquela primièra vertadièra botiga en linha dedicada als libres, DVD e CD en occitan, lo Centre Cultural Occitan de Roergue bota a posita de totes, sens cap de restriccion geografica e amb los delais de liurason los mai corts, una de las principalas ofèrtas de productes culturals (quicòm coma 1300 referéncias en tot).
Es un endrech ont o podètz quasi tot trobar : literatura (romans, poesias, novèlas, contes, literatura joenessa) d’Avairon e d’endacòm mais, utisses pedagogics (gramaticas, conjugasons, metòdes), libres-DVD de collectatge, libres istorics etnografics, darrièra nautat, grands classics o obratges pas tant coneguts.
Per segur, lo libre es l’article principal. Uèi, lo site www.ccor.eu e l’espaci de difusion de productes culturals del Centre Cultural Occitan de Roergue propausan de cap a 700 obratges.
I trobaretz plan mai de 100 títols de romans en lenga nòstra, mai de 80 contes, de libres de cançons, qualques libres policièrs, fòrça obratges de teatre occitan, mai de 80 libres de poesia, etc. Aital, totes los autors, los classics : Bodon, Mouly, Cantalausa, Bessou, Max Roqueta... e los contemporanèus : Vernet, Gayral, Viala, Brink, Cabayé-Ramos, Lagarda, Valet... son ara a vòstra disposicion, e ont que siatz.
Lo site del C.C.O.R. vos permetrà tanben de trobar la colleccion del Grelh Roergàs : Tastaire, M.Bony, Batut, Balard, Fau... e l’ensemble dels ostals d’edicion occitan : IDECO, Vent Terral, Letras d’Oc, IEO Lengadòc, CRDP...
Tanben, lo C.C.O.R. possedís una importanta gama de libre joenessa e una granda quantitat d’obratges pedagogics metòdes, diccionaris, vocabularis, gramaticas, collectatges amb tota la colleccion dels « Al Canton » de l’I.O.A.).
Un dels grands interèsses de l’espaci de difusion de productes culturals del C.C.O.R. es la qualitat e la prigondor de sa gama de CD. Lo cercle IEO de Rodés bota a vòstra disposicion 300 CD de tot tipe de musica. Plan segur, la musica tradicionala es a l’onor, e los CD dels grops tradicionals màgers son presents : Vialard, La Talvera, Pulles, Venta Civada, Laur, etc.
Lo Centre Cultural Occitan de Roergue vos prepausa tanben fòrça CD de musica de Nadal e una seccion musica contemporanèa de tria amb los albums dels grops que fan l’actualitat de la musica occitana : Nadau, Du Bartas, Castanha e Vinovèl, Mauresca, Goulamas’k, Aussibal, Brick a Drac, Massilia, Joanda, La mal coiffée, etc.
A mai, la seccion CD vos permet de trobar los albums dels umoristas Padena e Paul Bony.
A costat, de totes aqueles produches culturals, lo C.C.O.R. difusa tota una gama d’accessòris ligats a la lenga e la cultura occitanas : camisòts (òmes, femnas e mainatges : mai de 50 referéncias de las marcas « Val Pas res » o « Macarel », casquetas, berets, quarats, pòrta-claus, bandièras de totas las talhas e un vintenat de referéncias de pega-solets.
Aquel site serà un site internet bilingue. I trobaretz las animacions del C.C.O.R, l’agenda, l’istoric e la botiga. La botiga serà classada per categoria d’articles : libres, CD, DVD, accessòris : camisons òmes, femnas, mainatges, pòrta-claus, bandièra, casquetas, pega-solets e divèrs. Per cercar, poiretz tanben efectuar una recèrca per nom d’autor, editor o categoria d’article. A mesura l’ensemble dels articles de la botiga de l’Ostal del Patrimòni seràn disponibles per Internet.
Per vòstras crompas per Internet, lo C.C.O.R. vos assegura d’una recepcion per la Pòsta dins las 48h (exceptat se comandatz e desiratz pagar per chèc, dins aquel cas lo mandadís serà efectuat a la recepcion del chèc.
Los fraisses de pòrt son los seguents :
- 2 € per una comanda fins a 18 €,
- 4 € per una comanda de 18 fins a 30 €,
- 6 € per una comanda fins a 60 €,
- e a gràtis per una comanda de mai de 60 €.
Alara, ara trentalhetz pas mai e anatz visitar la librariá virtuala del C.C.O.A. www.ccor.eu
