Lo dimècre 4 d'agost de 2021 la Comission Europèa anoncièt qu'aviá precomandadas 200 milions de dòsis de vaccin contra la covid-19 a la societat Novavax.

Aqueste vaccin utiliza una tecnica diferenta de los que son actualament sul mercat europèu.

Doas tecnicas son actualament utilizadas :

  • La de l'ARN messatgièr, pels vaccins de Pfizer-BioNTech e Moderna, o un còde ARN es mandat a l'organisme per li permetre de fabricar la proteïna Spike qu'avia la produccion d'anticòrses contra lo virus de la covid-19.
  • La de las societats AstraZeneca e Johnson & Johnson qu'utilizan un virus modificat. Aqueste interpretat per l'organisme coma lo de la covid-19 permet la produccion dels anticòrses necites per aparar l'organisme. Aquesta tecnica es dicha a vector-viral o a adenovirus.

La tresena tecnica emplegada per la societat Novavax es dicha a proteïna recombinanta. Los vaccins que l'utilizan son diches proteïcs. Es una proteïna similara a la Spike qu'es injectada e que permet la reacion imunitaria. Es tanben sus aquesta tecnica que trabalhan los laboratòris de Sanofi.

Lo vaccin de la societat Novavax es pas encara autorizat per l'Agéncia Europèa dels Medicaments (EMA). La comanda de la Comission es anticipada e depend d'aquesta autorizacion.

Per aquel novèl vaccin doas injeccions seràn tanben necessària desseparada de 21 jorns.

Son eficacitat es similària a la dels vaccins a ARN messatgièr e se pòt servar a de temperaturas compresas entre 2° e 8° Celsius çò que ne facilita lo stocatge e la distribucion.