Del 21 al 23 de julhet de 2022 se debanarà a Rodés l'Estivada. Christian Teyssedre conse de la vila presenta aital l'eveniment.

Editorial de Christian Teyssedre al programa de l'Estivada de 2022

Aquò fa ara mai de 25 ans que, cada estiu, l’Estivada ven celebrar, a Rodés, la riquesa de la cultura occitana. Augan un còp de mai, lo festival vendrà far lum sus las arts occitanas dins un luòc extraordinari, los Harasses nacionals de Rodés !

O auretz comprés, en 2022, lo festival pren plaça dins los Harasses, lo recanton requist per l’organizacion d’un tal eveniment, de mercés son emplaçament mas tanben de mercés l’immensitat de l'airal que permetrà de vos aculhir en tota securitat e en tota convivialitat.

L’Estivada 2022 son de concèrts, de lecturas, de dança dins los Harasses nacionals mas tanben de pèças de teatre, de musica dins diferents luòcs de la Vila. Un programa plan eclectic que promet de balhar l'estrementida a Rodés lo temps d'aquelas tres jornadas e que ven portar la pròva que la cultura occitana es totjorn tan viva e actuala.

Teni a mercejar los agents de la Vila, las associacions, los actors culturals, los benevòls per lor trabalh e lor engatjament per tal de vos prepausar un festival de qualitat, bandièra estivala de la cultura occitana.

Vos convidi amb grand plaser a descobrir aquel programa que nos fa veire que la cultura de nòstra vila e de nòstre territòri es totjorn plena de vam.

Vos desiri a totas e a totes un bon festival e un polit estiu de 2022 !

Cristian Teyssèdre
Cònse de Rodés

[lo programa es aquí]