Al mes de març de 2023 l’Ofici Public de la Lenga Occitana (OPLO) comunicava sus sa recenta adesion a l’APLV, l’Associacion dels Professors de Lengas Vivas. Segon l'institucion, aquela adesion permetrà d’afortir la preséncia de l’occitan dins las instàncias nacionalas dedicadas a la transmission e a l’ensenhament de las lengas vivas.
L’Associacion dels professors de lengas vivas (APLV) es una associacion lei 1901 que fedèra l’ensemble dels ensenhants e ensenhantas de lengas vivas. Edita e publica la revista Las Lengas modèrnas que porta sus l’ensenhament de las lengas en general, la lingüistica aplicada a l’ensenhament de las lengas, la didactica de las lengas, las politicas lingüisticas, etc.
Una associacion per metre en ret los actors
L’APLV fedèra sustot una comunautat importanta d’ensenhaires e d'ensenhairas de lengas vivas estrangièras o regionalas (anglés, espanhòl, chinés, arab, etc.) aital coma d’associacions dedicadas a aquelas lengas. Mantun professors e professoras d’occitan es membre de l’APLV, totes sectors educatius confonduts. Es tanben lo cas de la FELCO (Federacion dels ensenhaires de lenga e cultura d’òc).
L’APLV es d’un autre costat membre de l’Observatòri Europèu del Plurilingüisme qu’a per mira de fornir una plataforma de mutualizacion dels mejans documentaris a l’entorn del plurilingüisme a l’escala europèa e de la Federacion Internacionala dels Professors de Lengas Vivas (FIPLV), fondada en 1931 e que dispausa d’estatut d’organizacion non governamentala al près de l’UNESCO. Collabòra egalament amb lo Centre Europèu per las Lengas Vivas e França Educacion Internacionala (èx CIEP).
Afortir la preséncia de l'occitan e lo discors de pròva a l'entorn del bi-plurilingüisme
Las disposicions estatutàrias de l’APLV preveson l’adesion d’organizacions partenàrias al títol de membres associats. Aqueles membres participan pas als vòtes mas pòdon préner part a las òbras. Son sustot sollicitats dins l’encastre dels diferents grops de trabalh.
Los membres de l’Amassada generala de l’OPLO prepausèron doncas son adesion a partir de l’annada 2023. La participacion de l’OPLO al trabalh de l’APLV permetrà d’afortir lo discors de pròva a l’entorn dels enjòcs del bi/plurilingüisme, en ligam amb lo desvolopament de l’ofèrta d’ensenhament en occitan. S’agirà egalament de desvolopar los escambis amb los actors institucionals e europèus. L’APLV serà egalament un mejan de valorizar d’unas iniciativas de l’OPLO, sustot las òbras del Grop de Recèrca Accion suls Fondamentals en didactica bilingua francés/occitan (GRAF).
L'OPLO, març de 2023