Petr Fiala, Dimitar Kovacevski, Edi Rama e Ursula von der Leyen lo 19 de julhet a Brussèlas
Petr Fiala, Dimitar Kovacevski, Edi Rama e Ursula von der Leyen lo 19 de julhet de 2022 a Brussèlas © Comission Europèa

Lo diluns 18 de julhet de 2022 los 27 païses membres de l'Union Europèa an donat lor acòrd per que se dubriguèsson las negociacions d'adesion a l'Union de Macedònia del Nòrd e d'Albània.

Lo primièr ministre albanés Edi Rama e son omològ de Macedònia del Nòrd Dimitar Kovacevski èran esperats l'endeman, dimars 19 de julhet, a Brussèlas per dubrir formalament las negociacions que prendran d'annadas.

Macedònia del Nòrd possedís l'estatut de candidat a l'Union dempuèi 2005. Albània obtenguèt aquel estatut en 2014.

D'enganas diversas ligadas a l'istòria tumultuosa entre aqueles dos païses e Bulgària e Grècia, alentiguèran las discucions.

Un darrièr punt qu'opausava Macedònia del Nòrd e Bulgària es estat solucionat a la debuta del mes de julhet de 2022 via la signatura d'un protocòl bilateral proposat pel president francés Emmanuel Macron alara qu'occupava encara al mes de junh, la presidéncia del Conselh de l'Union Europèa.