Josiana Ubaud propausa sul sieu site internet lo document Mai ont a passat la nòstra lenga ? Dreça aquí un inventari del massacre cultural menat pels actors de l'accion culturala en Occitània. Massacre que se complís en tota innocéncia, la boca en còr, e degun per se plànher. La desoccitanizacion es a s'acabar e Josiana Ubaud justament s'indigna.
Aquí la presentacion que fa de son trabalh :
« Entameni aicí un dorsier sus leis escòrnas fachas a la lenga, « en tota bòna consciéncia », per nòstrei responsables politics, associatius, scientifics, cercaires de tota mena, neuroticament franco-francés. E mai quand parlan de causas d’encò nòstre (arts decorativas, fauna, flòra, geologia, toponims, forçadament nommats en occitan), capitan de censurar impietadosament l’occitan ò de lo folclorizar despietadosament. De tot segur, i a de gran a mòure ò de grame a triar... o sabèm ailàs totei. Lo pretèxte que « lei lengas regionalas amenaçan lo francés » es evidentament una escòrna brandida per justificar l’estofament, d’autant mai que se laissan colonizar desvergonhosament per l’anglés. « Les élites vassalisées » que ne parla Claudi Hagège. Vassalizadas, esquinaplegadas, trionfalament desculturadas, impausant sa marcha vèrs un avenidor radiós sens istòria, sens passat, sens referéncia, sens umanitats au sens culturau. Lo desèrt... de la barbariá. »
