2015/2016 - Cada mes a Tolosa se ten a l'Ostal d'Occitània (11 carrièra Malcosinat, 18h30) un seminari Lengas e Poders. Aquí çai jos la presentacion que ne fan los organizators :
Qué pòdon los poders sus las lengas ? Qué pòdon las lengas suls poders ? Qu’es aquò e que pòt una lenga de poder ? Qu’es aquò e qué pòt una lenga despoderada ? O melhor, cossí las lengas pòdon èsser a l’encòp espleches de dominacion e aisinas de lucha contra la dominacion ? Un autre biais de prene aqueste subjècte de reflexion seriá de se demandar perqué la question de la democracia lingüistica es aital pauc e mal pausada, perqué demòra un punt sec dins la filosofia politica contemporanèa ?
Perqué tant de discors sus la libertat e l’afrancament, emai los que se vòlon mai radicals, se dison dins de lengas e registres de lenga que son las e los dels mèstres e dels poders instituits, e participan a aquesta dominacion lingüistica sens cap de reflexivitat critica ?
L’idèa es de fargar un seminari de recèrca en occitan, per demostrar dins los actes (de paraula e d’escritura) qu’es possible de desvolopar en filosofia e sciéncias socialas un discors critic e analitic dins una lenga çò ditz desprovesida de l’aparelhatge conceptual per o far. Plan segur las questions en francés (e dins las autras lengas conegudas pels intervenents) seràn plan vengudas, mas l’idèa es de servar l’occitan coma lenga d’exposicion e, per tant que serà possible, d’escambi. L’escomesa, autrament dich, es de trobar e fargar un public que parla o almens compren l’occitan, dispausat a participar a una reflexion collectiva de nivèl universitari.
