Se debanaràn lo divendres 26 e lo dissabte 27 de genièr Las Ivernalas de Cabardés. L'eveniment es organizat per l'IEO-Aude e lo Servici Cultural de Puègnautièr.

Tres rendètz-vos son al programa  :

1 - Un espectacle jove public, lo divendres 26, a 18h30, sala Na Loba : Quesaquò e Mascomprés, interpretat pel teatre TIO-La Rampa. La participacion es liura.

L'espectacle met en preséncia lo curiós Quesaquò e lo cercaire Mascomprés, seguits pel pichon Marchadedins. Aiman d'escotar las istòrias coloradas del Chivau drapèu. Fàcia a aqueste monde colorat de blau, de verd, d'irange... se trapa un mond tot gris ont senhoreja lo Glomi, qu'aima pas brica las istòrias, que vòl pas somiar e desira tot uniformizar, numerotar, racionalizar. L'afar se nosarà a l'entorn d'un cariolet multifoncional !

L'espectacle es jogat pel Joan-Loís Blenet, l'autor del tèxt, e per l'Ives Durand que pòrtan tot lor biais de comedians e contaires al vam d'una pèça ritmada, risolièra e creativa.

2 - Un espectacle d'umor, lo dissabte 27, a 19h : L'Occitanie pour les Nuls, per Florant Mercadièr.

L'an passat, lo public aviá presat los contes sortits del placard pel Florant. Lo contaire torna ongan amb sa novèla creacion. La tòca es de contar l'istòria d'Occitània, la pichona e la granda. Lo Florant s'ajuda de musica, d'umor e d'una bona dòsi de marrida fe per avançar una autenticitat segura que trasformarà la vision de cadun sul passat del país d'Òc. Aprendretz atal cossí los trobadors inventèron lo rap, l'òme terrible qu'èra Gaston Febus autor de la doça cançon del Se Canta...

Lo contaire s'amusa e vesita los contes e legendas que farguèron aquel territòri original entre doas mars e tres montanhas.

3 - A la fin de l'espectacle, se poirà passar a taula per una taulejada amicala, en ligason amb las Ampelofoliás de Cabardés, lo dissabte 27, a 20h30, sala de la Tor.

L'escasença d'un rescontre a la velha de la granda jornada de fèsta de la trufa negra e dels vins de Cabardés lo dimenge 28 a Mossolens. Un repais convivial amb un plat occitan que ten al còrs : sautat de pòrc amb patanas, los vins de Cabardés e lo muscat de Sant-Joan de Menerbés.

Espectacle : 5 € ; sopar : 15 € ; espectacle e sopar : 18 € ; sopar sus reservacion.

*

Las Ivernalas de Cabardés son organizadas per l'IEO-Aude e lo Servici Cultural de Puègnautièr, amb lo sosten del Conselh Regional Region Occitania-Pirenèus Mediterranèa, del Conselh Departamental d'Aude, de la Comuna de Puègnautièr, de l'Ofici Public per la Lenga Occitana en collaboracion amb lo Cercle Occitan del País de Carcassona, la Calandreta de Carcassona e las Ampelofoliás de Cabardés.