Se debana a Albi del 2 de junh al 31 de julhet de 2018 al Centre Cultural Occitan de l'Albigés la mòstra Emili Rieux e la lenga occitana.

L'ocasion de ne saupre un pauc mai sus de particularitats arquitecturalas pròprias a la ciutat, e sus Emili Rieux un dels actors de la respelida occitana en Albigés.

Presentacion dels organizators :

Coisina, teralhas, ceramicas e lenga d'òc : aquí avèm tot Emili Rieux (1861-1956). Es mai que mai conegut dels albigeses coma l’artesan del succés de l'ostalariá del Grand Sant Antòni e per los afogats de cultura occitana coma un felibre que s’es associat a totes los eveniments occitans al torn d’Albi. Rai, lo cosinièr èra totjorn aquí per regalar lo monde !

Me dirètz, e la ceramica ? Benlèu qu'avètz vist al mièg de l'avenguda del Colonèl Teissièr un ostal curiós cobèrt de ceramicas (n’i a malastrosament de tombadas...) Benlèu qu’avètz vist tanben que cada ceramica comportava un tèxte escrich en occitan. Es pro malaisit d'o véser dempuèi lo trepador e Dieu vos garde de l'espepiçar dempuèi lo mièg de l’avenguda... son l’òbra d’Emili Rieux.

Lo Centre Cultural Occitan d’Albigés li consacra una exposicion ont totas aquelas pèças seran confortablament reprodusidas suls panèls amb totas las explicas per plan comprene. A travèrs Emili Rieux e sos amics, veiretz desfilar de panèls en panèls tota la vida culturala e occitana albigesa entre 1900 e 1955.

Estrena lo 2 de junh a 17 oras – dubèrt duscas a 23 oras per la Nèit Pastèl, puèi de 15 a 18 oras en junh/julh – al COR 28 carrièra Ròcaguda a Albi.

Venètz nombroses !

Sorsa : centre-occitan-rochegude.org