Dictada occitana de 2019, lo Cercle Occitan de Narbona comunica :
Dempuèi ongan tretze ans, lo Cercle Occitan de Narbona organiza, lo darrièr dissabte de genièr (doncas lo 26 per ongan), e coma dins un quarantenat de vilas d'Occitània e de França (Albi, Arlas, Castras, Foix, Nimes, París e ne passi) e mai dels Païses Catalans (Barcelona, Valencia) una "dictada" en occitan, espròva acompanhada d'una animacion musicala amb la preséncia de nòstre taulièr amb un molon de libres, CD, DVD e autras besucariás occitanas.
Aquò pr'amor de defendre la Lenga Nòstra e nòstre biais de viure.
Ongan encara es la Salle des Foudres du Domaine de Montplaisir a Narbona que nos aculhirà, tre 14h e l'animacion serà un còp de mai assegurada per Ràdio Lenga d'Òc.
Del temps que se corregirà la dictada, lo CerÒc pagarà un vespertin als participants.
Seriam fòrça contents de vos véser o de vos tornar véser a aquela dictada, descontractada e festiva a l'encòp. Un farnat de prèmis per cada categoria : adultes, liceans, collegians e mainatges del primari, son ofèrts pel Cercle, sos partenaris e los mercands de Narbona.
La manifestacion es sostenguda per la vila de Narbona.
