Detalh de la cobèrta de l'album Me suis mise en danse de Camille Simeray
Dins son magazine numèro 21 del mes de decembre de 2019 la region Occitània presentava qualques artistas occitans.
Quand lo local ven internacional...
Torn d’orizon dels artistas occitans que raionan al nivèl nacional e perqué pas internacional.
L’audenca Camille Simeray e son grop Camille En Bal reçaupèran lo prèmi Gus Viseur 2019 per lor album Me suis mise en danse. Lo prèmi recompensa un artista o un productor que metèt l’accordeon en valor dins son trabalh. S'es dicha « onorada » en son nom e « al nom de totes los actors de la cultura occitana »
Camille Simeray succedís a mantuns accordeonistas, dont Cyrille Brotto, un autre nom de las musicas occitanas contemporanèas premiat en 2006. Autre premiat, lo quite Laurenç Cavalié reçaupèt lo Coup de Coeur de l’Acadèmia Charles Cros per son darrièr album Mon ombra e ieu.
Mas s’es question de reconoissença nacionala, los grops occitans an tanben l’escasença de ganhar las onors internacionalas : ansín lo qüatuor vocal La Mal Coiffée ven de se produsir a la Filarmonia de Francfort. Ongan se rendrán sus l’illa de la Reunion, ont farán un rescontre amb un grop local, e bastirán un dialòg musical entre l’occitan e lo creòl.
Res de nòu, per exemple lo grop Laüsa fa regularament d’anar-venirs entre nòstra region e Canadà, China o dins mantuns païses d’Euròpa, pròva que l’occitan pivela lo mond al delà de las frontièras francesas.
