L'estivada de Rodés s'aprèsta. Del dijòus 19 de julhet al dissabte 21 tres jorns d'animacions :
concèrts, conferéncias, discutidas, balètis... Aicí lo programa.
Dijòus 19 de julhet
15:00 / MJC – Crocodéon en saule mineur per la Companhiá del pOissOn sOluble. Conte e Mariòtas en musica.
Al vilatge, a la velhada, los banastièrs contan d’istòrias... Marcèl e Leon lo jove aprendís vos espèran a l’atelièr per descobrir un briat de banastariá, e mai que mai per ausir una aventura curiosa. Tataï, un dròlle del país, es a pescar plan planet a la broa del riu e te vei un animal estranh. Totes dos an subte e pr’aquò capitan a s’endevenir de mercés la musica... Mas los autres, lo mond del vilatge, acceptaràn aquela bèstia novèla del meteis biais ?
Dos comedians al còp marionetistas, musicians e contaires nos convidan a soscar d’un biais ludic e poetic sus l’idèa que nos fasèm de l’estranh, de l’estrangièr, de la diferéncia.
16:00 / Arquius departamentals – Katy Bernard e Monique Burg. Retraches d’Alienòr d’Aquitània. Conferéncia teatralizada.
Katy Bernard, mèstra de conferéncias d’occitan (Universitat Bordèu-Montaigne), autora de Los Mots d’Alienòr, Alienòr d’Aquitània e son sègle (Ed. Confluences, 2015), e Monica Burg, comediana e contaira, evocaràn la vida e lo ròtle d’Alienòr.
Descobriretz la duquessa d’Aquitània, que foguèt reina de França puèi reina d’Anglatèrra a travèrs los escriches que compausèt ela, e mercés als tèxtes dels grands autors que la coneguèron.
17:00 / Espaci destenda – Lançament del festenal.
17:30 / Scèna costat jardin – Dervish TanDances. Concèrt.
Dervish TanDances fabrica una musica en rond que liga lo còrs e l’èime. Es una declinason de combinasons musicalas entre orient e occident, tradicion e modernitat. Los artistas se plaçan dins un cèrcle de creacion e deslargan lor imaginari.
Se servisson de lors coneissenças de las musicas d’inspiracions orientalas, tradicionalas e actualas. Un còp es la votz que fonda l’existéncia d’una melodia que, a son torn, fa nàisser una linha ritmica puèi un còr a mai d’una votz. Un autre còp es la dança que pren lo jòc a son compte e que mena lo camin musical. Enfin es l’energia d’un cant sofí que pòrta sa transa a la melodia.
18:00 / Espàci balèti – Arnaud Cance / Paulin Courtial. Concèrt.
Arnaud Cance e Paulin Courtial son sus scèna per descadenar lor energia. Lo parelh fa petar las musicas a dançar. Lor repertòri, lo prenon dins de danças de collectatges de la cultura populara de lenga occitana e l’agrementan de compausicions.
Borrèias descabestradas, escotichas e polkàs cadençadas, valsas e mazurkàs enfachinairas son al programa. Paulin e Arnaud deslargan lor generositat e lorvam.
19:30 / Scèna restauracion – Lo Còr de Vinha. Concèrt.
Lo grop coral Còr de Vinha originari del Valon de Marcilhac, aima los vinhairons e lo vin e... los canta. Samuel Bras mena las voses coma se fa lo vin. Convivéncia, gaudiment, cançons per beure e per aimar al programa. Una formacion que pòrta naut e fòrt la lenga occitana per far sentir la doçor del valon.
20:15 / Granda scèna – Francís Cabrel, Claudi Sicre e lors convidats. Concèrt.
La Vila de Rodés prepausa una creacion originala : Francís Cabrel, Claudi Sicre e lors convidats encantan los Trobadors.
Aquela serada de dubertura, menada per Claudi Sicre e Francís Cabrel, se bastís a l’entorn de la tematica Trobadors « Rock star de l’Edat Mejana » a cada cesilha de creacion. Los dos òmes se veson dempuèi de meses a Astaffort.
Jean Bonnefon, co-fondator del grop Peiraguda e president de l’Associacion Voses del Sud a Astaffort a reviradas d’unas cançons principalas del repertòri de Francís Cabrel. Maitas seràn partatjadas sus scèna amb lo grop vocal del País Niçard e dels Alps Meridionals Corou de Berra, Marcel Amont, Dick Annegarn, Jean Bonnefon, Xavier Vidal, Manu Théron...
L’escasença de descobrir de cançons ineditas. Una mosaïca musicala de primièra que deuriá foncionar pel plaser de totes, abans que Francís Cabrel nos prepausèsse son repertòri.
Divendres 20 de julhet
14:30 / MJC – Peiraguda. Concèrt.
En 1977 Jean Bonnefon, Patrick Salinié e Jean Louis Garrigue fondan lo grop Peiraguda e li fan sègre la dralha del moviment qu’apelavan alara « La novèla cançon occitana ». Dins la rega de Claudi Marti, Nadau, Verdier, Patric, lo grop venguèt lo pòrta-paraula del Peiregòrd sus las scènas del Grand Sud dempuèi 40 ans d’uèi.
Pendent aquela pontannada de 40 ans, Peiraguda a jogat de centenats de concèrts en Occitània particularament, mas tanben endacòm mai en França ede còps en Espanha o als Estats Units.
15:00 / Salon dels editors – Programacion pels dròlles : Malika Verlaguet « Los mormolhs dels còdols ». Espectacle.
Se ditz que i a de peisses que parlan. O sabiái pas abans de m’arrestar a la broa d’aquela ribièra e de prene un còdol dins la man, un còdol fòrça doç. E çò qu’entendèri aquel jorn, l’emportèri amb ieu...
De contes qu’an seguit lo camin de l’aiga, e que, per la boca d’un peis ont se mesclan las lengas, convidan a se laissar anar al fi al dels imaginaris.
Contes pel public jove (6-12 ans). En occitan e en francés (de bon comprene per totas e totes).
15:00 / Arquius departamentals – Lançament de l’expausicion Trobadors CIRDÒC.
16:00 / Arquius departamentals – Fèlix Jousserand La Cansó. Adaptacion Musicala. Espectacle de poesia en musica.
Artista reconegut de la scèna slam... Félix Jousserand, ajudat per la dramaturga Carolina Masini, se lancèt coma escomesa de prepausar una relectura contemporanèa del tèxt emblematic de la Cansó. Cristòl Lavergne e Gèli Coronado l’acompanhan a la bassa e a la batariá.
Fèlix Jousserand balha a veire e a escotar un espectacle de poesia en musica, una interpretacion renovelada de mercés l’art del slam e una dobla traduccion inedicha (en francés e en occitan contemporanèu), que soslinha tota la modernitat de l’intemporala Cansó.
17:00 / Espaci editors – Renat Duran presenta tres escrivans. Seràn present Joan-Frederic Brun, Frederic Figeac e Jaumes Privat.
17:00 / Scèna costat del jardin – Feràmia. Concèrt.
Lo quintèt Feràmia jòga una musica eclectica d’influéncias divèrsas, que van del jazz a l’electrò en passant pel groove, per la musica tradicionala e las sonoritats etiopianas o uruguaianas. Los concèrts son de moments contrastats, entre repics alegres e improvizacion individuala o collectiva, entre finesa e energia quasi-punk. Tot aquò a per tòca de menar la lenga cap a de terradors sonòrs novèls.
La formacion atipica de Feràmia se compausa de cinc musicians (batariá, bassa, saxofòn, trompeta, cant en occitan). Lo repertòri es bastit pas que de compausicions originalas. Lo grop escriu una partida dels tèxtes en posant dins l’imaginari occitan. Los autres tèxtes son d’adaptacions de poèmas occitans del sègle XXen.
18:00 / Espaci editors – Aperitiu literari. Omenatge als òmes grands.
Ongan, lo rendètz-vos es pres sus l’espaci editor, per una ora d’escambi e de rencontre amb los autors e los editors que balhan tota la valor que s’amerita a la literatura occitana. Lo CIRDÒC a causit de presentar los tèxtes de qualques autors indefugibles de la literatura d’òc contemporanèa, que d’unes nos an quitats fa pas gaire, per fin de los onorar.
18:00 / Espàci balèti – Remolin. Concèrt.
Tres femnas, tres voses, Brigita Bigotte, Veronica Gal-Vidal e Brigita Cipière forman lo grop de bal Remolin (revolum). Xavièr Vidal (violon), Cristian Mage (acordeon), Olivièr Bayle (percussions) las acompanhan.
Lo grop anima los bals tradicionals dempuèi d’annadas e participèt a mai d’un festenal en França e a l’estrangièr. Cantan e fan virar las danças tradicionalas d’Occitània e mai que mai las danças de Carcin.
19:30 / Scèna Restauracion – Triò Savignoni e lo papet. Concèrt.
Del jazz manocha als accents del Sud. Perqué pas ? Totas las lengas se valon, l’occitan swinga tan plan coma l’italian, l’espanhòl, lo bambarà. Symon, Sam e Jacques demandan al Papet, aliàs Cauhapé de cantar los tèxtes que Robèrt Marti a escriches e recompausats. Lo tango tango se càmbia en Pinga Panga, lo Just a gigolo fa son numèro.
Los tres joves musicians fan vibrar las còrdas dempuèi ja 4 ans, Dins aquela formula de « triò a quatre » (tres musicians e un cantaire), aquò groova lo patoès, pulsa l’accent tonic.
21:00 / Granda Scèna – Concèrts.
21h00 – San Salvador : San Salvador es una formacion integralament vocala e a endralhat dempuèi d’annadas un trabalh de recèrca artistica sus la polifonia. Lo grop se maina mai de renovelar o de tirarlas musicas tradicionalas e del mond del costat de la poesia, que de manténer un « folclòre autentic », un patrimòni que se diriá « preservat ». La musica de San Salvador sauta pus lèu de planeta en planeta.
San Salvador fa un trabalh de compausicion originala e cèrca un folclòr imaginari. Trabalhan fòrça la musica vocala acostica e focalizan sus un novèl equilibri entre las voses femininas e masculinas. Mai que mai cantadas en occitan, las compausicions maridan los motius, de còps rufes, de còps doces de la lenga, a un trabalh armonic ont colors, imatges e sonoritats del pròchi e del luènh, se mèsclan.
22h30 – MinvielleTi’Bal
00h00 – Ministèri del riddim : dos charraires amb un DJ a las maquinas, per exprimir la pluralitat (en occitan, berbèr, francés, darijà) e tombar las cledas del cada jorn dins la convivéncia. Rub-a-dub chacha del Miègjorn, portat pel groove ipnotic mediterranèu. Lo maridatge del pebron e del solelh.
Dissabte 21 de julhet
10:00 / Multiplexe CGR – Cinèma. Filme tot public Heidi (StudioCanal) doblat en lenga occitana per Conta’m. Filme realizat per Alain Gsponer.
11:30 / Multiplexe CGR – Filme documentari Roots Tour.
Roots Tour de Claudi Sicre. Multilingüe e quitament en occitan, jostitolat en francés. Roots Tour foguèt creat pel festival Pòbles e musicas al cinèma, organizat per Escambiar, que se debana cada an al mes d’octobre a la Cinematèca de Tolosa.
La tièra dels filmòts es un torn del mond d’autenticas o d’eventualas tradicions musicalas : de suspresas a cada minuta, vengudas dels traucs d’enluòc e de pertot e quitament de Tolosa.
14:30 / MJC – Jove e polit : qu’es aquò ? Joan-Loís Courtial. Teatre.
Un professor se’n va a la retirada... darrièr jorn çaganhós amb d’escolans que fan la fèsta. Es una polida escasença pel « pròf » d’evocar d’esperel aquel temps ont èra, el, « Jove e Polit ».
Joan-Loís Courtial, talentós, es aicí al còp actor, cantaire, musicaire per donar vida a totes los personatges, amics d’enfança, camaradas, professors que l’an acompanhat dins aquelas annadas d’escòla, collègi e licèu.
15:00 / Espaci destenda – Iniciacion pels dròlles a las quilhas de uèch, defòra. Programa pels dròlles.
16:00 / Arquius departamentals – Jan Dau Melhau : Resisténcia a l’aire del temps, un Trobador modèrne.
En un temps, Jan dau Melhau foguèt objector de consciéncia. Resistent, o es, a tot poder, mai que mai a aquel de la maquina. Es del temps del païsan, de l’obrador, del saupre-far e del saupre-viure. Es de tot aquò que rendrà compte amb son tèxtes, en occitan e en francés.
17:00 / Scèna costat del jardin – Las Nòvas del Papagai. Concèrt.
Las Nòvas del Papagai s’inspira del Trobador Arnaut de Carcassés e de son òbra del sègle 12en. Un pichon conte sus l’amor adultèri, cantat, mes en musica e dansat d’après lo tèxt que Joan-Carles Huchet establiguèt (Flammarion, 1992).
Amb Evelina Moser (cant, vièla a arquet medievala, violon, arpa e organa a boca medievala), Pèire Lamoureux (contaire, dançaire), Aurelia Neuville du Breuilh (votz, triangle, palets, cimbaletas medievalas), Claudi Sicre (tusta-zoinc, metalofòn), Ektara (monocòrda medieval).
18:00 / Espaci editors – Aperitiu literari.
Venètz descobrir qualques-unas de las darrièras parucions de la literatura occitana pels joves. De libres a passar en familha, pels pus pichons coma pels bèls, tan la qualitat estetica e narrativa ne fan de palanquetas de primièra, cap a la lenga e la cultura occitanas. Benvengut al Centre de primièrs secorses occitans !
Demoratz en Occitània, o la visitatz ? D’unes mots e expressions (A vista de nas, avoir la cagne...) vos mancan per escambiar e presar tota la riquesa del territòri ? Dintratz dins aquel centre de primièrs secors occitan, nòstres servicis son aquí per vos prene en carga e vos ensenhar los gèstes e las praticas « que sauvan » en mitan occitan. Vos poiretz evaluar amb de tèsts auditius, visuals e cognitius. Poiretz descobrir vòstre camin de santat. Vos balharem d’exercicis e vos farem participar a d’obradors.
Sisètz-vos d’aise dins nòstra sala d’acuèlh. I trobaretz de revistas e de libres, e pels nenes vòstres, un espaci de jòcs. Oblidèssetz pas de tornar partir amb lo kit de subrevida !
18:00 / Espaci balèti – Dirty Caps’. Concèrt.
Un còp èra i aviá un Landés, un Bigordan e un Carcinòl. Passavan d’un bal a l’autre, d’un festenal a l’autre, comencèron a jogar ensemble. Fasián dançar lo mond e mai que mai una joventa que disián Capucina. Aquela d’aquí dançava d’un biais talament dirty qu’aquò inspirèt lo nom del grop : Dirty Caps.
Uèi, a cada bal, espèran de trobar de dançaires tan dirty coma Capucina. Alara a vos de far.
19:30 / Scèna restauracion – Festenal de la Musa. Concèrt.
Lo grop de cants del Festenal de la Musa es compausat d’un vintenat de personas del Sud-Avairon : Milhau e la val de Tarn. Joan-Loís Courtial, lo mèstre de cants mena las repeticions dos còps per mes a Sant-Bauzèli.
Lo grop canta de cançons tradicionalas, de poèmas de Joan Bodon meses en musica e de creacions originalas de Joan-Loís Courtial. Cançons doças, cançons engatjadas, cançons umoristicas, tot es bon per far cantar la lenga nòstra.
21:00 / Granda scèna – Concèrts.
21h00 – Mauresca Fracàs Dub – Los artesans del dub se son acampats per un viatge sens mudar, liberats dels còdis e de las mòdas, de l’espaci e del temps : en camin per un siesen òpus. Una union de cooperators per una aventura musicala alternativa e independenta : paraula nauta e ponh quilhat.
Posan al terrador del dub, trabalhan la fòrça dels subs, tustan de clavièrs electrics ese permeton d’apondre un pauc de funk o de trap dins un raggamufin a l’occitana. Mesclaires de generacions, bolegaires de lengas, passaires de culturas popularas : fan servir una lenga d’òc que parla al mond tot e que desplaça las linhas.
Après gaireben 20 ans d’existéncia (since 1999), son aquí : fòrts del viscut comun, son enrasigats aicí, mas son ja endacòm mai. Respondon totjorn presents, son tal coma los coneissèm, sens engana e pausan lo son que lor es pròpri. Las malas plenas de rimas, de maquinas e de pòrta-voses : desbarcan amb de remèdis al tristum, estent que, per eles, de pertot : « la musica es una medecina » !
22h30 – Les Diables de la Garrigue – S’èran aconsomits dempuèi 2012, mas los Diables de la Garriga tòrnan montar sus scèna per contunhar lor viatge mitic entre dos monds, l’electrò e l’instrumental. Los Diables de la Garriga son un rebrot del grop Goulamas’K e d’amics que venon d’asuèlhs artistics divèrses. En fach se tròban un desenat de personas que virana l’entorn d’aquel projècte ont los instruments tradicionals se bidòrsan e s’atrocèlan al son electro-tecno de Karden, e ont se mèsclan vidèos, decòrs e colors...
Un concèrt espectacle inedich e fòra del comun qu’agulhona los uèlhs, las aurelhas e lo còrs.
00h00 – ÒmiOrs – ÒmiOrs es la creatura bastarda entre òme e ors, la fusion improbabla de lor dualitat, la beutat de çò que los unís. Lor musica sembla los contes de las legendas de Joan de l’Ors. Es un pauc coma las luchas que deguèt menar la cultura occitana per traversar los sègles. Una musica que se pòt dificilament classar.
