Coma cada ans dempuèi mai de dètz ans se debanana a Tolosa las conferéncias dichas DUOC : Conferéncias dels Dimècres universitaris occitan e catalan.
Presentacion dels organizators
Per aquesta dotzena annada de DUOC, los ensenhaires-cercaires de la Seccion d’Occitan e de la Seccion de Catalan de l’universitat Tolosa - Joan Jaurès prepausan, mercés a l’ajuda de la region Occitània, un cicle de conferéncias que permet de rendre compte de la vitalitat de la recerca actuala sus las matièras occitana e catalana. Dempuèi lo lançament dels DUOC, de cercaires tolosans, franceses, europencs e americans, son venguts faire descobrir lo fruch de lors trabalhs a totes los esperits curioses que s’interèssan a çò que las recèrcas en sciéncias umanas pòdon produsir en tèrmes de coneissenças renoveladas.
Per aquesta edicion, los oranizators an agut a còr de convidar Patric Sauzet, ensenhaire-cercaire de l’universitat Tolosa Joan-Jaurés, que prenguèt la retirada al mes de septembre de 2019. Patric Sauzet presentarà al mes de febrièr lo pichon diccionari « de pòcha » en lenga occitana.
Après un apròchi lingüisitica, la lenga occitana, tan coma la lenga catalana, seràn mesa a l’onor per Ester Franquesa i Bonet, Directora Generala de Politica Lingüistica de la Generalitat de Catalonha, que presentarà la politica de promocion d’aquestas lengas mesa en plaça en Catalonha.
Enfin, la lenga catalana, restacada a una cultura que li es pròpria, farà l’objècte d’una conferéncia de Josep Vidal que seguirà un apròchi didactic. Aital, es jos mantunas perspectivas—lingüistica, politica, culturala e didactica que las lengas occitanas e catalanas seràn espepissadas dins aqueste novèl cicle de DUOC.
L’autra mitat de las conferéncias serà consacrada a la literatura de lenga d’òc.
Aurem lo plaser de reçaupre un cercaire italian, Alessio Collura, recentament diplomat d’un doctorat, que presentarà sas recercas a l’entorn d’una version occitana l’Evangèli de Nicodèm.
En avançant cronologicament, Bénédicte Louvat nos farà (re)descobrir lo teatre de Besièrs del sègle XVII.
Enfin, Maria-Joana Verny nos vendrà far descobrir lo Florilège poétique des langues de France dins lo qual son meses a l’onor de poètas tròp sovent desconeguts d’expression bretona, còrse, basca, occitana, etc.
Mercés a tote-a-s las e los qu’auràn fach viure, una autra annada, los Dimècres Universitaris Occitans e Catalans. En esperant poder renovelar aquesta experiéncia encara dins las annadas venentas.
