Lynne Cohen Corporate Office

Detalh d'una de la òbra de Lynne Cohen Corporate Office, 1986

Del 27 de junh al 22 de setembre, lo Pavillon Populaire, espaci d’art fotografic de la Vila de Montpelhièr, aculhissiá la mòstra Lynne Cohen. Doble òrb 1970-2012. Dins sa revista del mes de junh de 2019, la vila presentava l'eveniment.

Lynne Cohen, testimòni de son epòca

Amb la mòstra Lynne Cohen. Doble òrb 1970-2012, lo Pavillon Populaire es lo primièr en França de vodar a aquesta artista bèla, nascuda als Estats Units e naturalizada canadiana, una installacion retrospectiva de son òbra tota.

Brava clarvesença

Lynne Cohen efectua un trabalh fòrça original, que pertòca per son actualitat. Son apròchi es a l’encòp estetic, semiologic e idologic. Mercés a d’images plan mestrejats, gaireben cliniques mas pas jamai modificadas, l’artista mòstra de luòcs vuèjes ont la preséncia umana se manifèsta suggerida per de signes o d’objèctes usuals. Remanda lo real a sas quitas representacions : sas fotografias revelan çò que relèva del decòr dins de luòcs que nos semblan pasmens naturals perque son de la vida vidanta ; meton en evidéncia l’artificialitat, los adobaments plan plan agençats, dins d’espacis que consideram coma luòcs comuns.

Mercés a aquesta enquèsta fotografica meticulosament colorejada d’ironia, fa verire la realitat nuda, bruta e sens artifici d’un mond dominat per la cultura de la marcandizacion e de la consomacion de massa. « A mesura d’una òbra rigorosa e perfièchament mestresada, Lynne Cohen a aital subtilament reveladas las estrategias de susvelhança e de normalizacion dels comportaments socials contemporanèus, tant coma las intrigas e los compromeses de la sociatat nòrd-americana de la segonda mitat del sègle XX », çò explica Marc Donnadieu, cap conservator al musèu de l’Elisèu a Lausana e comissari d’aquesta mòstra.

Una mòstra eveniment

Lo Pavillon Populaire perseguís aital son projècte d’explorar las diferentas aplicacions del medium fotografic que s’estaca a presentar una brava artista, primadièra de la fotografia contemporanèa, injustament mesconeguda del public bèl. Dos espacis de mòstra e un centenat d’images per viatjar dins l’univèrs de Lynne Cohen.

Lo plan pè del Pavillon Populaire es vodat a una mesa en parallèla demest las fotografias color e format bèl de las annadas 2000 e los images al format mai modèst de la debuta de la carrièra de l’artista. Aquesta perspectiva permet d’apreciar las continuitats e las avançadas del trabalh de Lynne Cohen a mesura del temps.

A l’estanci, 35 imatges de las annadas 1980 cap a las annadas 2000 son de descobrir, e notadament de bravas serias suls estands de venda o de demostracion, las salas de las fèstas, d’espòrt, de classa o de formacion, los luòcs d’estimulacion, d’entrainament policièr o militar, los laboratòris scientifics o los espacis de cèrca medicala. Estrena, lo 26 de junh a sièis oras e mièja del tantòst, dubèrt al public.


Venècia : extrach del roman 'Mièja-Gauta'

Masqueta

Extrach del roman Mièja-Gauta de Max Roqueta paregut en 2010 a las edicions Trabucaire.

Conte : 'Lo meu ostal' de Joan Bodon

Plancat

Lo recuèlh Contes del meu ostal de Joan Bodon sortiguèt en 1951.

Amassada de Versalhas del 10 e 11 de març de 2022

Amassada de Versalha 2022

Lo 10 e 11 de març de 2022 se debanèt a Versalhas dins l'encastre de la presidéncia francesa del Conselh de L'Union Europèa una amassada. Remosèt los caps d'Estats e de govèrns dels membres de l'Union, la presidenta de la Comission e lo president del Conselh.

Critica del libre 'L'enfugida' de Joan-Ives Casanòva

'L'enfugida' de Joan-Ives Casanova

Un article de Clamenç Pech dins La Setmana numèro 981.

Sèrgi Viaule : critica del libre 'Lo mistèri de la Montanha Negra'

Lo mistèri de la Montanha Negra

En novembre de 2012 sul webzine Jornalet Sèrgi Viaule presentava lo libre de Cristina Clairmont Lo mistèri de la Montanha Negra.