Se debanarà lo 18 e 19 de mai de 2018, al Pont de Gard (30210 Vers-Pont-du-Gard), lo forum euroregional Culturas popularas en dialòg. Entrada gratuita sus inscripcion.
L'objectiu d'aquela manifestacion es de favorizar encontres e escambís entre los actors de la vida culturala d'aquelas regions : Occitània, Catalonha, Islas Balearas.
Son previst : conferéncias, talhièrs professionals, forums tematics, vilatge cultural. Se sètz una associacion, una federacion o un artista implicats dins lo dialòg cultural, los organizators vos convidan a venir presentar las vòstras accions e encontrar aquí d’autres actors culturals, per inventar las expressions culturalas de deman.
Aquelas doas jornadas son tanben un temps de fèsta, l'occasion per las populacions de l’Euroregion de descobrir, festejar e partejar las culturas popularas d’Occitània, de Catalonha e de las Islas Balearas.
Presentacion dels oraganizators : « Al caireforc de las culturas europèas, l’Euroregion Pirenèus-Mediterranèa (EMP) recampa a l’entorn d’un meteis projècte de cooperacion politic, administratiu e cultural, Catalonha, Islas Balearas e Occitània / Pirenèus-Mediterranèa. L’EMP es lo conservatòri d’un patrimòni cultural ric de sa diversitat, que l’occitan e lo catalan ne constituïsson lo fondament d’una identitat partejada per totes sos estatjants.
« Après un primièr Forum (Patrimòni e creacion, Castèlnòu d’Arri, 2016), lo CIRDÒC, la Fira Mediterrània de Manresa e Sa Xerxa - Fira de Teatre Infantil (FIET) dedican aquela edicion als actors del dialòg cultural, entre Pirenèus e Mediterranèa. »
Lo programa es [aquí]
