Visual de la manifestacion d'Albi per la lenga occitana
Lo 29 de mai de 2021 lo collectiu Pour que vivent nos langues apèla a manifestar. Una manifestacion se tendrà a Albi.
Lo 29 de mai, manifestacion a Albi !
Lo CREO Tolosa (Centre Regional de l’Ensenhament de l’Occitan de l’Acadèmia de Tolosa), l’IEO OPM (Institut d’Estudis Occitans Region Occitània), e lo CCOA (Centre Cultura Occitan de l’Albigés), juntats per la federacion Calandreta e Oc-bi, respondon a l’apèl del collectiu Pour que vivent nos langues e vos convidan a una manifestacion musicala lo dissabte 29 de mai a Albi.
Lo recampament es previst a 14h30 dins lo Pargue Ròcaguda (davant l’Hotel Rochegude, costat pargue), seguit de presas de paraula de las associacions organizatritz, puèi d’un desfilat en musica acompanhat d’artistas de la region dins las carrièras albigesas.
Mot d’òrdre : SOS ensenhament, sosten a la recenta lei relativa a la proteccion e a la promocion de las lengas regionalas e a son aplicacion.
Lo 21 de mai, lo Conselh Constitucional invalidèt dos articles d’aquel lei – concernissent l’ensenhament immersiu e los signes diacritics – considerats coma « anticonstitucionals ». Aquel decision es un atac grèu envèrs los e las qu’òbra cada jorn a l’ensenhament, a la promocion e a la defensa de nòstra lenga e nòstra cultura occitanas, a l’escòla e dins los luòcs d’usatge. Aquela accion es doncas essenciala per portar nòstre sosten a la lei Molac e per mostrar nòstra determinacion per son aplicacion en integralitat.
Alara, portatz vòstras bandièras, aprestatz vòstras pancartas e vòstres melhors eslogans e vestissètz vòstra masqueta la mai polida !
Comptam sus vòstra preséncia lo 29 de mai, per mostrar vòstra sosten, e vòstra estacament a nòstra polida lenga occitana !
Mobilizem-nos per que visca nòstra lenga !
