A la debuta del mes d'agost de 2021 se debanarà lo festenal occitan de Sant Juèri. Lo Centre Cultural Occitan d'Albigés comunica.
Del 5 al 7 d'agost festenal occitan a Sant Juèri en Albigés
Lo festenal occitan de Sant Juèri, tòrna aqueste estiu, e un còp de mai la vila se botarà a l’ora occitana los 5 e 7 d’agost.
Las associacions occitanas e Sant-Juerianas vos fargan dos jorns d’animacions, amb una volontat comuna : metre al lum la cultura occitana e la rendre accessibla al pus grand nombre. Una programacion collectiva, metent sul davant de la scèna las creacions occitanas actualas, mesclant totas las expressions artisticas, sul fial de la tradicion e de la modernitat.
Totas las generacions, de Sant Juèri e d’endacòm mai, son doncas esperadas per partejar un moment festiu e convivial, se daissar breçar per aquesta lenga cantanta, e faire viure la lenga nòstra !
