Jordi Ortiz de Antonio per la Generalitat de Catalonha presentava al XIIen congrès de l'AIEO a Albi (julhet de 2017) una reflexions a l’entorn d’una pedagogia propedeutica sus la lenga occitana pels professors de primari e segondari en Catalonha.
Nos assabenta sus l'estat de l'ensenhament de la lenga en Catalonha. Aquí lo resumit de sa presentacion (sorsa AIEO) :
L’occitan, lenga pròpria d’Aran e oficiala en Catalonha tota, se regulariza a l’ora d’ara, dins lo domeni educatiu, sonque pel biais del Currículum der aranés (1998), un plan d’estudis oficial restacat a l’airal geografic e dialectal aranés, e en aranés, en questions de lenga e literatura.
En defòra d’Aran manca encara una estructuracion curriculara per l’occitan e d’una formacion per de professors de primari e segondari.
Pr’aquò, lo Departament d’Ensenhament de la Generalitat de Catalonha es a ofrir, dempuèi l’annada 2015-2016, una formacion telematica per de professor(a)s de quina estapa educativa que siá en lenga e cultura occitanas. Lo cors “Lenga e cultura occitanas” es una formacion propedeutica sus la lenga occitana que sa tòca finala es la valoracion, lo dessenh e lo desvolopament d’activitats e de prepausas didacticas per far promòure la lenga e cultura occitanas en classa.
L’enjòc d’aquela formacion es la promocion de la consciéncia sus la realitat lingüistica, culturala e nacionala de la lenga occitana, e en occitan, per far veire als professors la tripla dimension d’òc : lenga, cultura e país.
D’un costat, l’introduccion a la lenga referenciala e sa diversitat dialectala, en tot partir de tèxtes reals tirats del mond del jornalisme e analisats pel biais de l’intercompreneson romanica. D’un autre costat, la cultura occitana, a prepaus de las manifestacions culturalas revendicativas d’Occitània. Fin finala, la bastison del país a prepaus d’una cultura de resisténcia, de relacions amb Catalonha e de lucha contra la diglòssia persistenta.
Per finir, las resultas d’aquesta formacion telematica se materializan dins una plataforma numerica oficiala, una mediateca pedagogica catalana que nos rend un apròchi cultural e lingüistic de çò que s’es compausada la lenga d’òc.
Jordi Ortiz de Antonio
