Dins lo sieu magazine d'informacion del mes de
junh de 2018 à Toulouse la ciutat mondina comunica
sus las activitats culturala de la fin del mes de junh.
Tolosa se celèbra en òc !
Del 23 al 25 de junh, tres jorns de concèrts, danças e reconstitucion per festejar l’istòria e las culturas de la Vila Ròsa.
Imaginada l’an passat per Convergéncia Occitana, la Fèsta d’Occitània vòl far conéisser la cultura d’òc e tot son ample geografic, que s’espandís plan mai luènh que lo territòri de la Region que ne pòrta lo nom. « Per aquò far aviam programat en 2017 d’artistes gascons e lemosins. Ongan aurem los provençals de Massilia Sound System en concèrt lo dimenge 24 al ser » precisa lo president de l’associacion, Joan-Francés Laffont. Un autre territòri es tanben convidat, Catalonha, que se farà ausir amb lo grop Gertrudis. « Son gaire coneguts aicí, mas fan referéncia de l’autre costat dels Pirenèus » assegura Estel Llansana, presidenta del Casal Català, partenari de Convergéncia.
Per sa segonda edicion, la manifestacion serà religada a un projècte municipal novèl e debutarà amb la reconstitucion d’un eveniment istoric : l’union de la filha del duc d’Aquitània e mèstre de Tolosa, Lampagia, amb lo governaire moro de Cerdanha, al sègle VIII. La tòca de l’eveniment es de mostrar qu’a Tolosa, crestians, musulmans o josius vivon ensems dempuèi de sègles ; emai partajan d’aujòls comuns. « Es lo Cònsol que celebrarà lo maridatge a 19h30 al Capitòli, reprend Joan-Francés Laffont. Puèi, tot lo mond anarà cap al Jardin de las plantas per un primièr concèrt. » E a mièjanuèit, serà alucat lo tradicional fuòc de la Sant Joan.
L'endeman matin, los Catalans prendràn la seguida. « Serà la 68èna edicion de l’Aplec de la sardana a Tolosa, un grand recampament de dançaires de 10h a 19h, detalha Estel Llansana. Amb aquel partenariat mostram lo ligam fòrt entre occitans e catalans ». Lo 25 de junh, enfin, es la data que marca los 800 ans de la liberacion de la Ciutat Mondina. Una granda corala d’escolans en occitan clavarà en doçor una dimenjada d’una densitat rara.
Fèsta de la Sant Joan, Fèsta d’Occitània 23, 24, 25 de junh de 2018.
