A la fin del mes de novembre de 2021, l'IEO sul site de la l'IEO/OPM publicava una plaqueta a l'atencion de las associacions per precisar son foncionament.
Los autors del document informan que l’Institut d’Estudis Occitans es una federacion d’associacions que s’espandisson sus tota la region lingüistica occitana e al delà. Constituïda de cercles locals òbra per la promocion de la lenga e de la cultura occitanas.
Qu'aquò siá al nivèl departamental coma al nivèl regional, se tròba un IEO o una associacion afiliada. Enfin l’IEO dich IEO Federal, recampa totes los nivèls e s’inscriu dins las instàncias mai que mai nacionalas o los collectius de lengas regionalas.
Lo document publicat precisa puèi la diferéncia que i a entre d'un costat las associacions afiliadas a l'IEO e de l'autre las associacions simplament aderentas.
Las associacions afiliadas fan part del malhum IEO. Los IEO departamentals e regionals devon èsser afiliats. Los cercles locals, eles, an la causida.
- Los estatuts devon èsser en conformitat ambe los estatuts federatius de l’IEO (validats pel Ministèri de l’Interior que l’IEO es reconegut d’utilitat publica).
- Los aderents de l’associacion afiliada pagan l’adesion IEO. Son membres de totes los nivèls : pòdon balhar lor vejaire e votar dins las instàncias de l’IEO (departamental/ regional/federal) perque se fa una reparticion financièra de l’escotisson.
- Especificitat de la region Occitània/Pirenèus-Mediterranèa : los dorsièrs de subvencion son centralizats per l’IEO OPM e portats cap a l’OPLO (Ofici public de la lenga occitana).
- Especificitat de la region OPM : una pagina dins lo guida de las associacions IEO de la region per presentar sas activitats e sul site ieo-opm.com, ajuda grafica, ajuda a la gestion associativa, jornadas de recampament, talhièrs...
- Un bulletin associatiu, Anem Occitans !, es mandat a cada aderent.
Las associacions aderentas sostenon lo malhum IEO, participan al movement de sosten a la lenga e a la cultura occitanas.
- Los estatuts son liurament definits per l’associacion que tendrà una gestion democratica e transparenta.
- Es l’associacion que paga l’adesion e pas los sieus aderents ; los aderents son pas membres de l’IEO. Es l’estructura que pòt intervenir dins las instàncias de l’IEO (departamental/regional/federal).
- Especificitat de la region Occitània/Pirenèus-Mediterranèa : los dorsièrs de subvencion pòdon èsser portats per l’IEO OPM, jos condicion.
- Especificitat de la region OPM : las associacions aderentas son listadas dins lo guida de las associacions IEO de la region e sul site ieo-opm.com, ajuda grafica, ajuda per la gestion associativa, jornadas de recampament, talhièrs...
- Un bulletin associatiu, Anem Occitans !, es mandat a cada associacion aderenta.
