L'IEO de la Region Occitània ven de publicar sa guida del malhum IEO per las annadas 2024-2025. Aquí çai-jos la presentacion que far del document Eric Fraj, president de l’Institut d’Estudis Occitans de la Region Occitània.
Presentacion d'Eric Fraj
L'institut d’Estudis Occitans (IEO), associacion lei 1901 creada en 1945, promòu la lenga e la cultura occitanas. Reconegut d’utilitat publica (1949), reconegut Joventut e Educacion populara (1986), l’IEO es una federacion de gaireben cent dètz associacions, dont nòu seccions departamentalas, dètz-e-nòu cercles locals, setanta sèt associacions aderentas. Causa d’aquò, es present dins la quasi totalitat del territòri de la Region Occitània/Pirenèus-Mediterranèa.
Cada associacion es un nos de la ret IEO : un lòc d’usatge e d’aprendissatge de la lenga-cultura d’òc, un crusòl d’iniciativas e de creacions de tota mena (corses, talhièrs, festivals, concèrts, bals, representacions teatralas, conferéncias, sortidas...). Caduna d’elas, per la varietat e la qualitat de sas activitats, fa de l’IEO un dels actors màgers de la perennizacion e del renovèl de l’occitan. Per l’estudi e lo far se desplegan, al còr de la societat actuala, d’espacis novèls qu’exprimisson a l’encòp l’especificitat e l’universalitat d’una lenga-cultura que, dels trobadors a las òbras mai contemporanèas, concernisson lo monde d’aicí e l’umanitat tota.
Aicesta guida es doncas mai qu’un panorama complèt de las associacions de l’IEO e de lors activitats. Respond a de questions basicas (Ont aprendre l’occitan ? Ont lo practicar ? Ont assistir a d’eveniments culturals ? Qui contactar pas trop luènh de l’ostal ? Cossí s’informar ? Etc.) mas es plan mai qu’aquò : vertadièra invitacion a la compartida en descobèrta d’una alteritat, invitacion a l’invencion comuna d’una pluralitat ciutadana novèla, d’un orizont cultural novèl, la ret IEO s’adreça pas a un public privat e captiu, mas al contra es obèrta a totas las personas e entitats, a totas las iniciativas — extèrnas e intèrnas — de collaboracions, de mutualizacions, de creacions collectivas. Nòstra guida es la vòstra, un dels instruments que, aicí e ara, reconcílian çò local amb çò global.
Eric Fraj
President de l’Institut d’Estudis Occitans de la
Region Occitania/Pirenèus-Mediterranèa
