Demande OTAN Finlàndia e Suèda
Los documents de demanda dins los burèus de l'OTAN lo 18 de mai de 2022 © NATO

Finlàndia e Suèda an demandat oficialament a intra dins l'OTAN lo dimècre 18 de mai de 2022.

« Aculhissi calorosament las demandas d'adesion de Finlàndia e de Suèda a l'OTAN. » declarèt Jens Stoltenberg, secretari general de l'institucion. Apondèt : « Es un moment istoric a un moment critic per nòstra securitat. »

Aquelas demandas èran en preparcion dempuèi qualques jorns. Sauli Niinistö président de Finlàndia tre lo dimenge 15 de mai de 2022 anonciava l'intencion de son país d'intrar dins l'OTAN. Ann Linde ministra dels afars exteriors de Suèda signèt lo document necessari la velha, lo 17.

Aquelas doas iniciativas son una consequéncia dirècta de la guèrra entamenada per Russia contra Ucraina.

Las candidaturas devon èsser estudiadas per los païses membres. Totes se devon posicionar positivament per qu'un candidat pòsca venir membre. Lo president de Turquia, Recep Tayyip Erdoğan, manifestèt clarament son desacòrd a l'accession d'aqueles dos païses.

L'Organizacion del Tractat de l'Atlantic Nòrd (OTAN) es una organizacion intergovernamentala creada en 1949. Son objectiu principal es d'assegurar la seguretat e l'independéncia de sos membres. Los mejans emplegats a aquela fin son al còp politics e militars.

Al delà del bon voler dels membres, l'adesion d'un novèl país es ligada a l'acceptacion d'un còr de valors comunas : repècte de la democracia, dels dreches de l'òme, de la libertat individuala e de l'estat de drech.

A la debuta de 2022 l'OTAN compreniá trente membres.