Lo president francés anoncièt lo dimècres 4 de genièr de 2023 que França anava mandar de veïculs blindats de tipe AMX-10 RC en Ucraina.
L'AMX-10 RC es un veïcul blindat de reconeissença dotat d'un canon de calibre de 105 mm ; sa concepcion data de las annadas setanta. Es considerat coma un carri armat leugièr. Es montat sus pneumatic.
L'anóncia es estada facha pel president Emmanuel Macron alara qu'Ucraina lucha dempuèi lo mes de febrièr de 2022 contra las agressions russas e demanda d'èsser equipada d'armaments adaptats a la lucha de liberacion que mena ; aimariá notadament dispausar de carris pesucs coma lo Leopard alemand, lo Leclerc francés o l'Abrams estatsunidenc.
Lo 5 de genièr Alemanha e Estats Units anonciavan qu'anavan tanben mandar de veïculs d'infantariá leugièrs : de Marder per Alemanha e de Bradley pels Estats Units.
Al nivèl de la defensa antimissil, Alemanha mandarà tanben un sistèma Patriot. Amb lo que los Estats Units preveson de liurar, los ucraineses n'auràn dos a lor disposicion.
Un carri AMX-10 RC en 2006
Un Marder en 2012
Un Bradley en 2013