Divendres 3 de febrièr de 2023, lo ministèri de la defensa francés dins un comunicat, anonciava que lo sistèma de defensa sòl-aire dich SAMP/T-MAMBA èra prèst a èsser installat en Ucraina.
L'anóncia es estada facha après una discussion entre Sébastien Lecornu ministre francés de la defensa e son omològ italian Guido Crosetto.
Son installacion es prevista per la prima de 2023. Aquel sistèma, segon Sébastien Lecornu, permetrà a Ucraina de se defendre contre los drònes, los missils e los atacs d'avion. Protegirà una part significanta del territòri ucrainés.
França e Itàlia s'accordèran en fin d'annada de 2022 per fornir a la demanda d'Ucraina aquel sistèma de proteccion. Lo SAMP/T-MAMBA pòt detectar de dotzenas de ciblas e n'interceptar dètz al còp. Aquò's lo sol sistèma de proteccion antiaerian europèu que pòt inteceptar de missils balistics.
Los Estats Units e Alemanha de lor costat preveson d'installar en Ucraina de sistèmas diches Patriòt.
Carri equipat d'una batariá de missils del sistèma SAMP/T-MAMBA