Lo 26 de junh de 2020 los organizators de l'Escòla Occitana d'Estiu de Vilanòva d'Òlt comunicavan :

Après lo confinhament, lo desconfinhament, sas règlas sanitàrias rigorosas, un pauc de libertat s’anóncia mas nos cal demorar prudent ! Amb aquò s’ajusta l’anóncia del licèu “L’Oustal” lo 16 de junh (!) d’èsser dins l’impossibilitat d’aculhir l’EOE. Calguèt donc trobar lèu-lèu d’autras solucions.

Vos podèm dire uèi que l’estagi d’estiu de l’Escòla Occitana d’Estiu se debanarà plan del 16 al 22 d’agost a Vilanuèva, mai prèp de la vila, a l’Institucion Santa Catarina. Totas las activitats seràn mantengudas, mai o mens, (corses, talhièrs, conferéncias, espectacles) dins la mesura de compatibilitat amb las règlas sanitàrias.

L’escoleta d’estiu (acuèlh dels 5 a 9 ans) e l’escol’ados (acuèlh dels 10 a 16 ans) que demandan encara mai d’atencion uèi per las organizar en respectar las constrenchas sanitàrias son pas mantengudas. A l’ora d’ara, nos mancan encara qualques entresenhas per lançar las inscripcions, serà possible segurament la setmana que ven.

Reservatz donc las datas, e a lèu-lèu !