Dins son bulletin de ligason del mes de junh de 2022 l'IEO comunicava sus sas activitats.
Los redactors precisavan d'en primièr qu'Eric Fraj veniá d'intrar al Conselh d'Administracion de l’IEO. Es el que prenguèt al mes de mai la presidéncia de l’IEO-Occitània Pirenèus Mediterranèa (OPM) après M. Tayac.
Aquò serà donc el que representarà l’IEO-OPM dins lo CA de l’IEO.
Notavan tanben que lo malhum IEO, essent membre de doas organizacions internacionalas, ELEN (qu'òbra per l’egalitat entre las lengas) e NPLD (que vòl promòure las lengas regionalas e minoritàrias), participèt a l’acamp general de NPLD que se debanèt a Brussèlas lo 18 de mai de 2022 per representar l’occitan. Lo president novèl, Miguel Angel Sureda Massenet (Islas Balearas) marquèt son interès per l’egalitat numerica entre las lengas.
I aguèt a l'escasença d'aquela amassada mantuna bona novèla – per exemple en Irlanda, País Basc, Islas Balearas – e de maissantas tanben – la censura de la lei Molac en França. Una taula redonda foguèt dedicada a l’ensenhament en immersion en Euròpa. Las estatisticas son claras : l’immersion balha als escolans una competéncia de nivèl B2 en lenga minoritària (e aquò sens demesir lo nivèl dins las autras matèrias). La representanta del País Basc assabentèt lo mond que lo nivèl B2 sufirià pas per salvar la lenga basca e que lor cal passar a una novèla estapa. Per exemple, los Bascos vòlon metre la lenga dins los clubs dels espòrts populars (en particular lo fot).
