L'IEO prepara l'edicion d'un libre en omenatge a Robèrt Martí que defuntèt en 2021. Es en soscription entrò a la fin del mes de setembre de 2022. Çai-jos la comunication de l'editor.

Robèrt Martí, l’òbra-vida

Las edicions de l’Institut d’Estudis Occitans (IEO-IDECO) son aürosas de vos presentar aqueste omenatge a Robèrt Martí, auta figura de l’occitanisme contemporanèu, que nos daissèt en mai de 2021. Aqueste libre non pretend pas dire lo tot d’aquel personatge pauc comun. Cada contribucion vòl simplament parlar, a son biais, de l’òme, privat o public, e de son òbra.

Testimoniatges o analisis, los tèxtes recampats ofrisson totes una vision particulara, personala e subjectiva, mas ça que la, d’un escrit a l’autre, las constàncias son evidentas, que revèlan una persona una e multipla a l’encòp : l’amorós d’un país e d’una lenga, lo passionat de transmission, l’escrivan prigond, l’autor de cançons e d’articles, de pèças umoristicas, lo pedagòg eficaç e aimat, l’òme de l’uèlh esperitós, lo militant entosiasta e infatigable, l’intellectual cultivat e dreit, de l’engatjament sens ambigüitat, lo contaire sens pariu, lo timide que pòt auçar la votz e s’expausar quand o cal, l’amic fidèl...

Al mond que contribuïguèron, aqueste omenatge s’impausèt coma una evidéncia, per dire l’astre e lo bonaür d’aver conegut En Robèrt Martí, e tot çò que li devèm. Manièra de li tornar un pauc de tot çò que nos donèt e nos dona encara.

De fotografias e d’illustracions qualitadosas acompanhan los tèxtes signats de Claudi Alranq, Josep Arasa Ferrer, André At, Mirelha Braç, Joaquín Castillo Blanco, Bernat Cauhapè, Joan-Loís Cortial, Olivièr Daillut, Josiana Daunís-Martí, Joan-Claudi Forêt, Eric Fraj, Jacme Gaudàs, Roger Harvey, Sèrgi Javaloyès, Sèrgi Labatut, Florant Mercadièr, Danièl Rifà, Alan Roch, Estefe Ros, Joan-Claudi Sèrras, Claudi Sicre, Joan Thomàs, Muriel Vernières, Sèrgi Viaule, Joan Vilòta.

La coordinacion del libre foguèt assegurada per Josiana Daunís-Martí e Eric Fraj.

Lo prètz de la soscripcion pel libre es de 12 € (al lòc de 15 € pus tard, fòra soscripcion), despensas de mandadís inclusas. Es obèrta fins a la fin de setembre 2022 e lo libre serà enviat als soscriptors e a las soscriptrises tanlèu paregut.

L'IEO
Estiu de 2022


Musica : Festenal Déodat de Séverac

Déodat de Severac, 1892

Dins son edicion del mes de decembre de 2024, lo jornal de la comuna de Tolosa, À Toulouse, donava la paraula a Jean-Jacques Cubaynes director del festenal de musica Déodat de Séverac.

Lo freg, al pè del fuòc...

Freg e lops

En 2018 dins sa rubric Aital Òc lo jornal Centre Presse publicava lo tèxt d'E. Sodís : Lo freg al pè del fuòc.

Lo collectiu 'Per que viscan las nòstras lengas' escriu al Primièr Ministre

Pour que vivent nos langues

Lo collectiu Per que viscan las nòstras lengas mandèt al Primièr Ministre francés lo 2 de mai de 2025 una letra per lo questionar sus la plaça de las lengas minorizadas dins la reforma de la formacion iniciala e del recrutament dels ensenhaires.

Sul libre de Régine Lacroix-Neuberth 'Le Théatricule et le caleçon d'écailles'

Le Théatricule et le caleçon d'écailles

Critica de Robèrt Lafont del libre Le Théatricule et le caleçon d'écailles.

Publicacion : aprene l'occitan e promòure lo 'patrimòni'

Apprendre l'occitan, promouvoir le 'patrimoine' de Gregoire Andreo Raynaud

Sortiguèt al mes de genièr de 2023 lo libre Apprendre l'occitan, promouvoir le 'patrimoine' de Gregoire Andreo Raynaud. Es estat publicat per L'Harmattan.