Dins lo Papieròt menerbés del 20 de genièr de 2022, Alan Roch tornava sus l'òbra de Georges Brassens. Extrach.

Brassens seriá mòrt ?

Lo Jòrdi Brassens que, dins lo revolum de celebracions d’aquò e de quicòm mai, se celebrèt los cent ans de sa naissença l’an passat, m’aprenon que seriá mòrt e mai mòrt !

Sustot avançan que sos mots e sas rimas serián pas mai de sason. Qué volètz anar caçar los parpalhòls alara que los pesticidis an rendudas inutilas las agulhas per los puntar sus un tablèu de siure ?

Perqué prononciar una non-demanda de maridatge en temps de maridatge per totes e de divorcis multiples ?

Los cirques an pas mai de zòo : impossible qu’un gorilha se’n escape !

I a pas mai d’amoroses suls bancs publics ont es plan malaisit de s’assetar e encara mai de s’apiejar.

Cresètz qu’un Auvernhàs vos balharà un còp de man o que valdrà mai trepejar dins la tropelada a la pòrta del Restaurant del Còr ?

La marrida reputacion l’auretz pas al vilatge : tres messatges falsièrs sus Morre-de-boc1 e vòstre compte serà bon !

Seriá plan estonant que l’Ofici de Torisme de Seta pèrde tres plaças sus la sabla de la Cornicha per un cementèri personal.

Lo vendeire de paratròn demòra a l’ostal, fa sa propaganda sul Net e, probable, que susvelha la femna amb qualque camèra o besonha electronica.

Margòt poirà plan descranconar lo casabèc, serà pas grand causa dins las èrsas d’imatges marcats X, o Y o Z ! Pòdes plan èsser pornograf, mas ont trapar un fonograf ?

Sul radèl de la Medusa, comptar suls collègas en primièr es pas faire pròva de separatisme rapòrt a l’anar de la societat ?

Amb la multiplicacion dels vira-l’ase2 e de las rocadas, vai-te’n saupre qual es lo pont que sufís de passar !

Quinas batèstas te caldrà menar per salvar un arbre, ametlièr o garric, quand serà folzejat o que dintrarà pas mai dins la planificacion d’urbanizacion que pren en compte la mesa en plaça de falses espacis verds ?

L-214 te tombarà sus l’esquina se cridas : « Mòrt a las vacas ! ».

Qual se carcanha al jorn d’ara per saupre se la messa es en latin o dins una autra lenga de la granda Babèl ?

Lo temps fa plan quicòm a l’afar que tantes e tantas son a córrer de longa (per ont e perqué : aquò’s una autra question).

Se trapas una font d’aiga clara, serà ja encantinada per la vendre al prètz d’una blanqueta de Limós.

Del moton de Panurgi, pas possible de ne parlar al singular (e cal èsser plan singular per creire que lo plural val pas res !) que lo paure s’es demultiplicat.

E tu, Jòrdi, èras plan nascut endacòm, non ? Malaisit de morir per d’idèas quand las idèas novèlas son ja vièlhas l’endeman. Per contra, vertat, que quand los cons son cons e ben ! demòran cons (Mas en çò nòstre, lo mot pòt èsser d’amabilitat e de complicitat !)

Alan Roch (Papieròt menerbés 20/01/2022)

Nòtas de occitanparis.com :

1 Allusion a Facebook.

2 Per giratòri.


Prefaci de Frederic Mistral a 'La pauriho' de Valèri Bernard (1899)

paurilha

En 1899 sortissiá a Marselha lo libre La pauriho de Valèri Bernard amb un prefaci de Frederic Mistral.

Florian Vernet : presentacion de la tresena edicion del 'Dictionnaire grammatical de l'occitan moderne'

Vinha

En 2020 sortissiá a las Premsas Universitària de La Mediteranèa (PULM) la tresena edicion del Dictionnaire grammatical de l'occitan moderne de Florian Vernet.

Union Europèa : ajudas a la infrastructuras de transpòrt

Ralh ferroviari

Lo dijòus 22 de junh de 2023 la Comission Europèa comunicava sus la politica de l'Union en matèria de transpòrt. Son 6,2 miliards d'èuros que seràn investits dins las infrastructuras.

Lei santons de Provença

Sus los santons de provença, un article de la revista del conselh general de las Bocas de Ròse, Accent de Provence, numèro 263, novembre e decembre de 2016.

Max Roqueta e lo roman

Mièja-Gauta

Lo tèxt çai-jos es extrach de la plaqueta de presentacion de la mòstra : Max Roqueta, la libertat de l’imaginari, que se debanèt en 2014 e 2015 a Montpelhièr.