Pleaga IEO Edicions de 2021
Quatre libres son previst. Pòdon èsser commandats abans lor sortida. La soscripcion es dubèrta fins al 21 de mai de 2021 al prètz de 49 èuros franco de pòrt.
Lo prètz public serà puèi de 64 èuros, sens comptar lo pòrt. Los libres sortiran lo 1èr de julhet de 2021
*
Amontanhatge es un roman de Miquèu Arnaud. L'accion se debana al sègle XV.
Dins los comtats de Provença e de Forcauquier, l'autor seguís las vidas de tres jovents que venon de quitar l’enfança : « Sei vidas èran traçadas, mai jamai ren es calhat. Ansin, lei destins d’Amielh, de Bertrand e de Clemenç foguèron borrolats. Amielh que deviá èstre lauraire, serà pastre ; Bertrand que veguèt lo jorn entre mastra e forn, aurà ges de farina dins lei mans, mai l’espasa ; Clemenç enfantonet nascut dins un vilatjon, passarà sa vida dins lei clastras d’una abadiá. Promés a una existéncia quieta, sei vidas fin finala foguèron pas de lònguei ribieras tranquillas. Sabián pas qu’enregant un camin per lo quau èran pas predestinats, se trobarián implicats dins lei torments de l’Istòria. »
Lo libre de 256 paginas es publicat en co-edicion entre IEO Edicions e IEO-CREO Provença, amb l'ajuda del Conselh regional de Provença-Alps-Còsta d’Azur.
Miquèu Arnaud es nascut a Marselha. Pro lèu, aguèt una enclinacion per la lenga e la cultura nòstras. S’installèt puèi dins un vilatge pròche Marselha alara qu’una bèla part de sos abitants parlavan la lenga occitana. Es en familha que se perfeccionèt dins lo parlar provençal maritim. L’enveja de partejar l’occitan e de gardar viu son usatge lo menèron a escriure son premier roman, Quora la matèria... que foguèt publicat en 2017 per IEO Edicions.
*
A l’ombra dels cerièisses bèles es un roman de Bernadeta Romieu.
La cerièreda de la bòria de las Fontanèlas, una istòria de familha, una longa istòria, contada un jorn de prima a Flavian per son grand, Benedit. Un raconte mas sobretot l’escasença de li fisar lo lagui que lo rosega despuèi fòrça annadas : Rosan, son filhòl, s’ensalvèt un jorn aprèp una brèva disputa amb el. Las novèlas se faguèron de mai en mai escarsas e un jorn pas pus res !
Flavian serà encargat de lo retrobar e de lo far tornar. Mas cossí apariar son mestièr de reportaire de guèrra que li daissa pas grand relambi e aquela cèrca incertana ? L’escomesa es granda mas una promessa es una promessa e mai li calga se gandir luènh, talament luènh...
Lo libre conten 164 paginas.
Bernadeta Romieu es nascuda a Bessuejòls en 1950. Estúdia las letras modèrnas a la Facultat de Tolosa abans de se consacra a l'ensenhament per l’Educacion Nacionala dins l’Acadèmia de Tolosa puèi dins aquela de Lion. Viu en Roergue dempuèi qualques ans. Locutritz nativa, decidiguèt un jorn de far de l’occitan sa lenga d’escritura.
*
Disparicions es un recuèlh de novèlas de Joan-Claudi Sèrras ont, coma dins Masquetas e Mariòtas (prèmi Pau Froment, 1986), sèm sus la rara entre vida vidanta e subrenatural, dins un univèrs ont tot, a cada segonda, pòt caplevar e desaparéisser per l’efièch d’una volontat clara o escura, mas tanben sens cap de rason...
Extrach de Maridatge blanc : « Atràs, sola, ramponada a la ridèla, la nòvia, ela, disiá pas res jol vel. Tot lo sang se li èra trait de la cara. Tremolava de contunh, e degun se’n mainava pas. Vertat ça que la que fasiá mens freg ; un aire docet se levava. Fariá plaser de véser fondre aquela nèu. Catarina agachava la pagina esbleugissenta e voida del mond, que puntuavan sols los accents circonflèxes dels gòrbs. [...] »
Lo libre de 188 paginas es publicat amb l'ajuda de la region Occitània.
Joan-Claudi Sèrras es nascut en 1944 dins Tarn. Professor de letras classicas e d’occitan, romancièr, foguèt responsable de las edicions a IEO-Ideco de 1987 a 1995. Trabalhèt a la redaccion del Lexic Elementari (IEO, 1996) e del diccionari Tot en òc (IEO, 2002). Es tanben l'autor del roman Enlòc (1988, IEO Edicions).
*
Coma un cadavre al riu getat es un roman policièr de Jòrdi Peladan.
L'accion es situada en Cevenas a l’entorn del pargue nacional. Aquí la subrepolida e petejanta detectiva Margarida Cercamond e son lòctenent menan l’enquèsta. Lor caldrà furgar al mitan d’una comunautat de Ipís, de borruts coma se dis dins lo país, d’un « neò-cevenòl » que viu en salvatge dins lo mas de familha, d’un ancian rasetaire vengut alcolic e borrèl d’ostal, de son amic caçaire de singlars e de ben d’autres.
Encontraràn dins lor barrutlatge la regenta del vilatge apassionada de botanica, una anciana actritz de cinemà X venguda cabrièra, e de ben entendut trobaràn sus sa rota lo comissari Pepichòt, son segond l’inspector Gaspard e las doas policièras, Bregida e Anhès. Tot aquel mond dins un decòr espectaclós de valats, de sèrres e de castanhièrs.
Un episòdi de mai de las aventuras de Margarida Cercamond.
Lo libre fa 208 paginas.
Jòrdi Peladan nasquèt en 1938 a Alès d’una familha cevenòla. Ensenhèt las matematicas e l’occitan. Militant occitanista, se’s engatjat al prèp de l’IEO e de la MARPOC, es un animator regular de l’Universitat Occitana d’Estiu de Nimes.
Son darrièr roman A planta cotelet es estat publicat en 2018 a cò de IEO Edicion.
[Clicar
per telecargar lo .pdf
del bulletin de soscripcion a la plega]
