Après una primièra « plega » pareguda aqueste estiu, IEO-Edicions ne presenta una segonda per Nadal. Son quatre libres novèls que seràn publicats.

Son en soscripcion al prètz de 49 € (al luòc de 63 €). Los fraises de mandadís son incluses.

La soscripcion es duberta fins al 25 de decembre. Se pòt comandar en linha via IDECO o amb lo bulletin de soscripcion.

*

Enquestas a la lesta de Joan Ganhaire (A Tots Crimis n° 237 (novèlas), 160 paginas).

« Mai quò ‘nava, mai lo comissari Darnaudguilhem sentiá que quela scena de crime era pas coma las autras. A la debuta, quo era estat d’una granda banalitat. Una vielha femna matrassada dins son apartament de la vielha vila, segurament per quauque arcandier vengut li raubar sas economias. Pas bien de misteri quí-dedins. »

Dètz novèlas per dètz enquèstas a la lèsta del famós comissari Alexandre Darnauguilhem de Maraval en Nauta Dordonha.

*

La Nassa de Miquèu Arnaud (A Tots n° 238 (roman istoric), 324 paginas).

Per Febrièr de 1474, lo rei de França deu tenir targa al còp a l’Anglés e al Borguinhon. Conten los enemics mai quasi tota l’armada es sus lo pè de guèrra e son marge de manòbra es estrech. Pasmens, Loís XI tèsta aquí vòl espandir sa tela. Provença, terraire fòrça ric, dubertura segura sus la Mediterranèa es una pèça màger de l’espandiment. Mai sos projèctes son contrariats, que lo rei Reinier decidisse de lo deseiretar. Abramat, arrogant, plen de cròia, es pas possible per el de pèrdre la fàcia. En consequéncia, ordís un plan per esbrandar lo comte de Provença e ansin s’apoderar del comtat.

Miquèu Arnaud es nascut a Marselha en 1952. S’installèt dins un vilatge pròche Marselha dins un temps qu’una bèla part dels abitants parlavan provençal. Es en familha que se perfeccionèt dins lo parlar provençal maritim. L’enveja de partejar l’occitan e de gardar viu son usatge lo menèron a escriure.

*

Vint jorns au bot de l'Antropocèn de Joan Glaudi Puech (A Tots n° 239 (roman), 136 paginas).

« Per la terapia me demandèt de faire un esfòrç e d’adoptar, un temps solament, lo manifèst de Thoreau dins « Walden ». Me diguèt qu’aqueu libre èra estat una revelacion per fòrça femnas e òmes dau sègle XX, l’esvelh a un rapòrt diferent au Monde. Anar viure per bòscs, acantonar la vida, la trocejar d’aise d’aise en morselons per ne saborar tota sa substància fins a tocar au sublim, perqué pas ? E puei ont anar ? Que faire ? Ai signat. »

Joan Glaudi Puech nasquèt en Castanhal Cantalesa e demorèt trenta cinc ans de temps en Provença. Vint jorns au bot de l’Antropocèn es son primièr roman publicat dins la colleccion A Tots. Es tanben l’autor de Una pèira e un tamborin, Lei filhas de Sion, Flors paganas e En bosca de Pan.

*

Bóstias de Joan-Claudi Sèrras (A Tots n° 240 (novèlas), 344 paginas)

Aqueste obratge, majoritariament escrit en 2021, prepausa una garba de tèxtes sus una tematica qu’es lo camp lexical de las bóstias. Se tracha pas d’un recampament a posteriori d’òbras qu’òm se maina de lor punt comun mas d’una experiéncia d’escritura a constrencha prealabla sens cap de limita de las variacions possiblas. Balha de tèxtes de tota mena, de tota dimension, de tota tonalitat, de l’umorisme a la tragedia, de la poësia al fantastic.

Dins la darrièra istòria, Lo Sòmi d’Ipocrates, la situacion contemporanèa evocada, la del Covid, ven premonitòria e lèu – qual sap ? – la ficcion poiriá èsser confortada o trespassada per l’anar del mond.

Joan-Claudi Sèrras, nascut en Albigés en 1944, foguèt professor de francés e d’occitan. A publicat a las edicions de l’IEO de recuèlhs de novèlas, un roman, Enlòc, d’obratges de lexicologia e una tièra de libròts de pensadas mai o mens umoristicas jol chafre de Rascal.

Estampar lo bulletin de soscripcion.


Cristian Rapin : Louis XIV en Occitània

Louis XIV en costume de sacre, Hyacinthe Rigaud, 1701, detalh

Dins la revista Lo Lugarn numèro 94, Cristian Rapin presentava lo libre d'Hubert Delpont Parade pour une infante.

Critica del libre 'École, Histoire de France et Minorités nationales'

Ecole, Histoire de France et Minorités nationales, Napoleon Bonaparte

Critica per Romieg Pach del libre de Claude Gendre e Françoise Javelier : École, Histoire de France et Minorités nationales (Fédérop, 1978)

Votacion del Parlament Europèu per melhorar la mobilitat electrica

Lògo recarga electrica

A la debuta del mes de julhet de 2023 lo Parlament Europèu votèt per l'adopcion de règlas novèlas per fin de far créisser lo nombre de las estacions que permeton de recargar los veïculs electrics. Las novèlas disposicions preveson tanben de ne facilitar l'usatge.

Lei santons de Provença

Sus los santons de provença, un article de la revista del conselh general de las Bocas de Ròse, Accent de Provence, numèro 263, novembre e decembre de 2016.

Ives roqueta, escritura, enfança e... lo libre de François Cavanna 'Les Ritals'

Cavanna 'Les Ritals' detalhs

En 1979 dins la revista Aicí e ara Ives Roqueta tornava, alara que veniá de legir lo libre de François Cavanna Les Rital, sus son rapòrt a l'enfança coma escrivan.