Edmonde Goulesque

Edmonde Goulesque

Al mes d'avril de 2021 morissiá Edmonde Goulesque. Lo Centre Cultural Occitan d'Albigés (CCOA) tornava sus la vida d'aquela aparaira de la lenga nòstra.

Adieu-siatz, Edmonda !

La còla del CCOA es trista de vos faire part del decès d’Edmonde Goulesque, sòcia fòrça implicada e plan engatjada per sa lenga e sa cultura occitanas.

Nasquèt en Avairon, a Conac, prèp de Requista e del país de Joan Bodon, a la debuta de las annadas trenta. Sola dròlla d’una familha cresenta, viu sola amb sa maire a la mòrt de son paire, a sos 13 ans, a la fin de la Segonda Guèrra. A aquela epòca, es pas aisit de sortir d’aquel mitan païsan : sa destinada segon son primièr regent serà, non pas de faire d’estudis, mas de « cridar après las aucas e de gardar las fedas e las vacas ».

Edmonda, bona escolana e ja determinada, passa lo concors per l’Escòla Normala... e o capita ! Mas es sa maire que li refusa aqueste còp : per ela, la fe crestiana e l’ensenhament public se maridan mal, subretot per una filha.

Es alara que partisson totas doas a París, dins un ostal eiretat d’un oncle de la familha. Edmonda ne garda pas de bons sovenirs : a París, lo mond se trufa d’ela, de son accent... Après aquel exili, Edmonda se’n tòrna dins son Occitània, a Tolosa, al moment de la Guèrra d’Argèria. Comença d’ensenhar dins lo privat : los òmes partits a la guèrra, una plaça ven de se liberar. Mas dins aquela escòla d’òmes e pels òmes, es a l’ensag, sonque per un mes : aquí volián pas de femnas... Ensag transformat, i demorarà 35 ans !

Coma aimava de dire, es professora de lenga estrangièra : lo francés. E òc, sa lenga mairala es plan l’occitan ! Conscienta d’aquò, s’interèssa al moviment occitan de las annadas setanta, dins l’optica de ne descobrir mai sus la cultura e d’aprendre a escriure sa lenga. A l’Escòla Occitana d’Estiu, a Vilanòva d’Òlt, rescontra de mond, de personas de son atge, coma ela, e vei qu’es capabla.

Cresenta, son marrit ocupa una plaça importanta dins sa vida. Ven d’un mitan diferent : faguèt los Arts e Mestièrs, a un pòste important dins l’aeronautic, e participèt notadament al lançament de Caravelle. A sa mòrt en 2005, se sarra del Centre Cultural Occitan de l’Albigés per n’ocupar una plaça centrala de vici-presidenta fins a uèi, e al punt de se crear una familha novèla dins l’associacion.

S’engatja al còr del Centre Occitan Ròcaguda (COR), a dos passes de son ostal, amb espèr e conviccions. Mena – amb vam ! – de talhièrs e d’animacions divèrsas : d’emissions de ràdio, de talhièrs de conversacion al COR e dins d’ostal de retirada, de visitas occitanas del musèu Tolosa-Lautrec... Participa amb fervor a totas las activitats possiblas e quitarà pas jamai de prepausar d’activitat novèlas pel COR. Son « volontariat per la lenga » li permet de tornar trapar los raices de son mestièr : ensenhar als autres, e d’o faire dins sa lenga. E n’es bravament fièra !

Amb Edmonda, la lenga canta a plena votz ! Los e las qu’a aprés amb ela ne pòdon testimoniar : per salvar la lenga, la cal parlar, e per la parlar, la cal contar, la cal cantar. Son fòrt temperament marca los esperits, e en retorn, es plan urosa de poder transmetre tot çò que sap.

Ça que la, la vida contunha d’èsser ruda amb ela : en 2013, foguèt reversada per una veitura al pes de son immòble. Grèvament nafrada, passa per de moments dificils per se’n remetre. Pasmens, i daissa ni son engatjament, nimai sa determinacion !

A tot just 89 ans, es la Covid qu’acabarà per aver rason d’Edmonda. Defensora infatigabla, al parlar franc, perdèt pas jamai la fe, ni en la religion, nimai en sa lenga.

Mercés Edmonda, e adieu-siatz plan !

Lo CCOA, abril de 2021


Extrach del 'Lo fiu de l'uòu' de Robèrt Lafont

Dins lo conte Lo fiu de l'uòu publicat en 2001 per Atlantica, Robèrt Lafont s'arrèsta dins sa narracion a Besièrs en 1209 del temps de la crosada e del grand masèl. Extrach.

Enric Pascal de Ròcaguda

Enric Pascal de Ròcaguda

Dins lo corrièr dels lectors de La Setmana en febrièr de 2013 Ramon Ginolhac tornava sus l'òbra d'Enric Pascal de Ròcaguda.

Las negociacions per integrar Macedònia del Nòrd e Albània dins l'Union Europèa debutan

Petr Fiala, Dimitar Kovacevski, Edi Rama e Ursula von der Leyen lo 19 de julhet de 2022 a Brussèlas

Lo diluns 18 de julhet de 2022 los 27 païses membres de l'Union Europèa an donat lor accòrd per que se dubriguèsson las negociacions d'adesion a l'Union de Macedònia del Nòrd e d'Albània.

Sul libre 'Composition Française' de Mona Ozouf

Après la sortida del libre de Mona Ozouf Composition Française Joan-Guilhem Roqueta ne fasiá la critica.

L'occitan es un balon de rugbi !

rugbi

En setembre de 2013, J. B. publicava sul site de l'IEO d'Aveyron lo sieu punt de vista sus la lenga occitana.