Lo dissabte 20 de novembre de 2021 a 17h se debanarà al Centre Occitan Rochegude (COR) la conferéncia 1907, la route des gueux.

1907, la route des gueux es un roman de Leon Còrdas escrich en francés en 1948 e retrobat per sa filha Magali Jarque en 2016. Es ela qu'animarà la conferéncia.

Presentacion del COR :

1907. Argelièrs, dins Auda, e sas vinhas e garrigas. Marcelin Albèrt, modèste cafetièr e vinhairon, entrepren de mandar un telegrama a Clemenceau. Es aital qu’un dels mai grands soslevament de la region espetarà.

Dins Lengadòc e Rosselhon, lo pòble vinhairon, fòrça afeblit per una crisi viticòla grèva, s’amassa alara per protestar e manifestar. En efièch, dempuèi 1900, la subreproduccion e las leis del governament se sòldan per una casuda fòrta dels prètz e una malavenda del vin, que menan a la roïna tan los pichons viticultors coma los negociants. La revòlta pren una amplor tala que lo 9 de junh de 1907 son pas mens de 600 000 manifestants que se reünisson a Montpelhièr ! Ernèst Ferroul, conse de Narbona, apèla a la demission de sos collègas e marca la debuta de la desobesissença civica. Mas lo moviment serà durament reprimit pels soldats que faràn sèt mòrts a Narbona, mas que, après aquò, se mutinaràn a Agde e se ligaràn a la populacion.

Ça que la, la determinacion dels protestataris abotirà a una lei per la proteccion dels vins naturals, sostenguda per Joan Jaurés al parlament.

Inspirat d’aqueles eveniments istorics, l’autor occitan Leon Còrdas escriguèt en 1948 lo roman inedit 1907, la route des gueux.

Conferéncia, Albi, Magali Jarque, 2021

Viure 1965 : Revolucion Occitana

La revista Viure fondada en 1964 foguèt pendent un desenat d'ans lo luòc d'expression privilegiat per la critica, las analisas, l'expression d'una pensada occitana liura.

Extrach del 'Lo fiu de l'uòu' de Robèrt Lafont

Dins lo conte Lo fiu de l'uòu publicat en 2001 per Atlantica, Robèrt Lafont s'arrèsta dins sa narracion a Besièrs en 1209 del temps de la crosada e del grand masèl. Extrach.

Estudi sus la Cançon de la Crosada

En 2015 sortissiá lo libre Lorsque la poésie fait le souverain, Étude sur la Chanson de la Croisade Albigeoise.