L'IEO de Vilafranca en Roergue comunica :

L'IEO del Vilafrancat vos convida a una serada a l'entorn dels cants occitans de Nadal lo dissabte 16 de decembre de 2017 a 20h a la glèisa de Vabre-Tisac.

Seràn presentas las coralas : lo talhièr de cant polifonic de Vaserac de Tarn e Garona, lo talhièr de cant del Centre Occitan Rochegude d'Albi, lo talhièr de cant de Renat Juriè, la Korala Paisana de Morlhon (LKP).

A la fin de la serada partajarem lo vin caud e la fogassa.

Serada dubèrta a totes, participacion liura. Venètz nombroses !

Lo 16 de decembre de 2017 a 14h30 se tendrà al CIRDÒC de Besièrs l'amassada generala dels amics del CIRDÒC. Totas la personas interessadas son convidadas a venir i participar.

Lo rescontre serà seguit d’un moment convivial e cultural amb lo tradicional concèrt de Nadal.

L'associacion n'aprofiecha per tornar rapelar sa foncion :

« Amb la creacion del Centre internacional de documentacion occitana en 1975, l’escrivan Ives Roqueta e los primièrs donators, contributors, cercaires, artistas e militants engatjats dins la construccion d’una « bibliotèca internacionala occitana » realizèron un projècte istoric : dotar la cultura e la societat d’òc d’una institucion culturala enciclopedica, professionala e de vocacion internacionala cargada de recampar per transmetre e far viure dins lo mond contemporanèu la riquesa e la diversitat de las expressions artisticas, scientificas, politicas e socialas occitanas.

Dins la revista Lenga 75 (2014), Pèire Pessamessa presenta l'article « Lou tron de l'èr e la premsa marselhesa dau sègle XIX ». Extrach :

Introducion

Tot de lòng dau sègle XIX, lo pòble marselhés parla encara sa lenga, lo dialècte provençal de la lenga d’òc, amb 99 % dei locutors en 1800 e dessota dei 50 % en 1900, que la davalada comencèt a de bòn dins leis annadas 1860-1870, amb lei progrès de l’ensenhament. Tot aquò per situar lo contèxte quand pareiguèt lo jornau popular setmanier Lou tron de l’èr que visquèt de 1877 a 1882.

Lo 5 de decembre de 2017 en partenariat amb lo Centre Cultural Occitan d'Albigés, l'associacion tarnesa ARPO organizava un Cafè Poesia en Occitan.

Ramon Ginolhac presentava la manifestacion :

Collòqui del 25/11/17 a Narbona Region Occitània : per una fòrça culturala occitana. Las vidèos.

Entrò al 31 de decembre de 2017 a destinacion dels bibliotecaris de la Region Occitània lo CIRDÒC, LR2L e lo CRL-Midi-Pyrénées organizan una enquèsta suls besonhs professionals en matièra de lenga e de cultura occitanas.

Lor objectiu es de desvolopar l’ofèrta de formacion, d’otisses e d’acompanhament dels professionals dels establiments engatjats dins la preservacion e la promocion de la lenga e de la cultura occitanas.

Francesca Celi dins una nòta [ligam] publicada per l'Institut Florian de Cèus detalha los que presidèron las fèstas felibrencas de París de 1879 a 1908.

Propausa d'extraches de las dichas, e per caduna una analisa.

L'institut Florian de Cèus que nos balha aquela presentacion es istoricament ligat a l'associacion dels Amics de la lenga d'òc creada per Joseph Loubet. Aquel, originari de Montpelhièr, la creèt en 1920, amb per ambicion d'amassar los occitans de París altorn de l'estudi de lor lenga. Çò que capitèt de far, e uèi encara en 2017 l'associacion es viva.

Lo divendres primièr de decembre de 2017 a 18h00 se tendrà a Rodés a l'Ostal del Patrimòni una conferéncia sus Antonin Perbòsc, escrivan e contaire. Serà animada per las edicions Letras d'Òc.

Lo 19 de decembre de 2017 totjorn a 18h00 a l'Ostal del Patrimòni a Rodés Roger Lassaque presentarà lo libre Camin de guèrra de Jules Cubaynes.

Lo site occitanica.eu presenta una nòta d'estudi sul libre de Prospèr Estieu Lo Fablièr occitan. Estampat en 1930 aquel libre recampa de fablas del mond entièr, traduchas en occitan. Segon occitanica, emai siá pas estat pensat aital, apareis coma una emanacion originala de l’idèa de « convivéncia » dins la literatura occitana de la debuta del sègle XX.

Lo CIRDÒC de Besièrs ven de publicar son rapòrt d'activitat per l'annada 2016. Tornam publicar çai jos l'introduccion de son president Patric Roux. Torna sus l'aventura de sa creacion que debutèt fa 40 ans e sus las activitats del centre en 2016.

CIRDÒC, temps 3 : l’ora es venguda !

Fa pas que quaranta ans d’aquò. Arribavan d’Occitània e del mond entièr los primièrs libres, archius, manuscrits, filmes, documents, enregistraments sonòrs en responsa a l’apèl de qualques unes amassats a l’entorn de l’escriveire Ives Roqueta. La granda bibliotèca de la lenga e de la cultura occitanas que de generacions de sabents e d’artistas avián desirada veniá - enfin ! - d’èsser creada.

L'Institut d'Estudis Occitans de la region Occitània organiza lo dissabte 18 de novembre de 2017 a 14h a Albi una jornada de reflexion sus los centres culturals occitans de proximitat.

Dins lo libre que Marceau Esquieu consacrèt a Paul Froment, Lo libre de Paul Froment (1986), Joan-Pèire Tardiu presentava lo poèta. Aquí lo sieu tèxt.

Paul Froment, poèta d'univèrs

Al cap d'aquestas annadas pels camins de la lenga e de la civilizacion d'òc, quand, de còps que i a, l'espèr ven a mancar, tòrni legir quauques vèrses de Froment. Sabi alavetz que trobarai dins quauquas regas, dins quauquas flors de prima del poèta-vailet, plan mai meritosas que lor quite nom, la certitud que dins d'endevenanças de malastre, de misèria culturala fonsa, pòdon nàisser pr'aquò las paraulas pus justas.

Los dimècres universitaris occitan e catalan se tendràn coma l'an passat a Tolosa a l'Ostal d’Occitània (11 carrièra Malcosinat M° Esquiròl). La dintrada es liura. Las conferéncias son en francés, en occitan o en catalan.

Joan-Francés Courouau qu'organiza aquel cicle, a la debuta del papieron de prensentacion fa lo punt :

Albuga.info, mèdia perigordin, publica sul sieu site una presentacion del jumelatge entre lo vilatge d'Albuga e lo de Marckolsheim en Alasàcia.

Los ligams entres aquelas doas localitats remonta a 1939. Extrach :

Quitar son Alsàcia, sa maison, totas sas referéncias, e se retrobar dins lo Perigòrd Negre enquera plan rural de las annadas 40 fuguèt pas tot-parier una escorreguda toristica per los 80 000 Alsacians condamnats a l'exòde en Dordonha lo 1^ièr de setembre 1939, jorn de l'invasion de la Polónia per l'Alemanha. D’autant que lor sejorn durèt pas una setmana mas ben una annada, jusca en octobre 1940, data de lor retorn dins lo camp de roïnas qu'èra vengut entre temps lor vilatge, Marckolsheim, situat per son malaür al còr de la zòna dels combats.

Annia Pla e Irena Pradal de l'institut APRENE de Besièrs, presentavan en julhet de 2017 a Albi, pel XII^en congrès de l'AIEO, lor trabalh d'experimentacion pedagogica : ipotèsis cooperativas cap a la pertinéncia educativa dels dispositius d'avaloracion a l'escòla elementària.

Resumit (sorsa AIEO) : Las regentas e los regents de las Calandretas, al dintre de l'establiment APRENE menèrem dempuèi la debuta d'experimentacions per avalorar (dins lo sens de donar de valor) los escolans e los estudiants.

Lo trabalh en pedagogia institucionala nos butèt de longa a questionar las modalitats d'avaloracion dels calandrins e dels calandrons e a adaptar tecnicas e institucions que cambièron la dinamica de las formacions.

Un article de Robèrt Lafont dins la revista Lo Lugarn numèro 69 (automne de 1999). L'autor aicí torna sus un article d'Ives Gorgaud publicat dins la revista precedenta, Lo Lugarn numèro 68. Li sembla important de clarificar qualques punts sus l'istòria de l'occitanisme, sul Felibrige, e l'accion de sos membres.

De 1926 à 1999 : rampèu a la rason occitana

Pòde pas laissar passar sens precisar d’unei ponchs, aquelei que son de ma coneissença, l’article un pauc fantasmatic (que m’escuse !) d’Ives Gorgaud. O fau d’aitan mieus que siau d’acòrdi amb toteis aquelei que pensan que l’aventura occitana ven d’intrar dins una fasi nòva, qu’apelère lo Temps Tres, amb un pauc de quicha dins l’avança (1991), ont l’apesason es l’establiment d’una veritat sus lo passat. Es d’alhors per aquò que vène de publicar Pecics de Sègle, ont dise tot justament de causas que sabe e que lei pus joves ignòran generalament.

Lo dissabte 28 d'octobre de 2017 a 19h30 James Thomas presentarà a la librariá Berkleley Books of Paris (8, carrièra Casimir Delavigne 75006 París) son trabalh de traduccion de l'occitan a l'anglés.

Legirà d'extraches de The November Boy, traduccion del Gojat de Noveme de Bernat Manciet (libre en preparacion), e de Grains of Gold son antologia de la literatura occitana que publiquèt en 2015.

Per ne saupre mai sul trabalh de James Thomas veire lo site mezura translations.